Ürək-damar cərrahiyyəsində adətən istifadə edilən sintetik protezlər yalnız diametri 5 millimetrdən çox olan böyük damarlarla yaxşı işləyir. Əgər söhbət daha dar damarlardan gedirsə, o zaman problem yaranır: qandakı zülal onların daxili divarlarına çökərək qalır və tədricən tromb yaradır. Bundan başqa, əgər protez uşaq vaxtı qoyulubsa, yeni cərrahi əməliyyatlar etmək lazım gəlir, çünki uşaq orqanizmi inkişaf etsə də protezdə böyümə baş vermir.

Bunun həlli yolu yeni damarın inkişafı üçün kömək edəcək və tədricən əriyəcək protez ola bilər.

 

Aztibb.az "Nauka i jizn” saytına istinadla xəbər verir ki, Böyük Pyotr adına Sankt-Peterburq Politexnik Universitetinin, İ.P.Pavlov adına Birinci Sankt-Peterburq Dövlət Tibb Universitetinin və Rusiya Elmlər Akademiyasının Yüksəkmolekullu Birləşmələr İnstitutunun əməkdaşları damarların böyüməsi üçün matris hazırlayıblar. Matris təbii damarın lifli quruluşuna çox oxşayan nano və mikrolifdən ibarətdir. Fiziki-kimyəvi xüsusiyyətlərinə - mexaniki möhkəmliyinə, məsaməliliyinə, hidrofobluğuna görə bu material damar üçün müvəqqəti protez ola bilər və onun üzərində əsl damar inkişaf edəcək.

 

Siçovullarla aparılan təcrübədə aortaya polialktid əsaslı matris qurulub.

 

Məqalədə qeyd olunur ki, süni damar (damarın sahəsi) həqiqisi ilə əvəz edilib: matris 16 ay ərzində iz qoymadan əriyib. Doğrudur, yeni damar ilkin mərhələdə təbii damarla oxşayırdısa, sonda onda anevrizmə rast gəlindi. Damarın divarını möhkəmləndirmək lazım olduğundan tədqiqatçılar növbəti dəfə matrisə damarın ona möhkəmlik verən orta qatının hüceyrələrini əlavə etməyi planlaşdırırlar. Bu, anevrizmlə bağlı problemi aradan qaldırmağa kömək edəcək.