Dünyada həkimlik qədər şəfalı, şəfqətli, xeyirxah və humanist peşə yoxdur. Bütün zamanlarda, xalqlar arasında həkim cəmiyyətin ən çox sevilən və hörmət edilən təbəqəsi sayılıb, onların haqqında hikmətli sözlər yazılıb. Seçdiyi peşəsindən, mövqeyindən asılı olmayaraq, hər kəsin qəlbində bu sənət sahiblərinə qarşı ali hisslər yaşayır.

 

Aztibb.az-ın "Həkimlərimizi tanıyaq!" rubrikasında söz açacağımız Mətanət İsmayılova da sevilən-seçilən həkimlərimizdəndir. O, bu günədək mənalı həyatını bütünlüklə şərəfli işinə, müqəddəs peşəsinə, insanların sağlamlığına həsr edib.

 

Mətanət Əlisahib qızı İsmayılova 21 fevral 1966-cı il Şirvan şəhərində anadan olub. 1983-1985-ci illərdə Qazıməmməd Dövlət Dəmir Yol Xəstəxanasında işləyib. 1985-1991-ci illərdə N.Nərimanov adına Azərbaycan Dövlət Tibb İnstitutunun Müalicə-profilaktikası fakültəsində təhsil alıb. 1991-ci ildə Əli Bayramlı (Şirvan) Şəhər Mərkəzi Xəstəxanasında internatura keçib.

 

O, 1995-ci ildə Şirvan şəhər Mərkəzi Xəstəxanasında nevropatoloq vəzifəsində çalışıb. 2010-cu il II Terapevtik şöbədə həkim-nevropatoloq işləyib. 2021-ci ildən isə Terapiya şöbəsində nevropatoloq kimi fəaliyyətini davam etdirir.

Mətanət İsmayılova 14 oktyabr 2015-ci ildə Həkimlərin Sertifikasiya Şəhadətnaməsindən keçib.