Noyabrın 2-də ATU-nun İctimai fənlər kafedrasında Vətən müharibəsində qələbəmizin ildönümü ilə bağlı Tələbə Elmi Cəmiyyətinin konfrans keçirilib.

Kafedranın müdiri, professor Qoşqar Əliyev tədbirdə çıxış edərək 44 günlük Vətən müharibəsinin tarixi əhəmiyyətindən danışıb. Rektor tarixi Qələbəmizdən danışarkən ulu öndər Heydər Əliyevin əsasını qoyduğu ordu quruculuğu siyasətinin Prezident İlham Əliyev tərəfindən uğurla davam etdirildiyini bildirib: "2020-ci ilin bu günlərində Müzəffər Ali Baş komandanın rəhbərliyi ilə Azərbaycan ordusu torpaqlarımızı düşmən caynağından azad etdi. Şübhəsiz ki, gələcək nəsillər hələ uzun illər bu şanlı tarixi fəxrlə qeyd edəcək və bu möhtəşəm qələbənin müəllifi olan Müzəffər Ali Baş Komandanımızın möhkəm iradəsindən və dəmir yumruğundan dönə-dönə bəhs edəcəklər”.

ATU-nun Elmi işlər üzrə prorektoru, dosent Rauf Bəylərov gənclərin vətənpərvərlik ruhunda tərbiyə olunması istiqamətində bu cür tədbirlərin keçirilməsinin əhəmiyyətini vurğulayıb. Bildirib ki, 44 günlük Vətən müharibəsində Azərbaycanın öz haqqı uğrunda mübarizə aparmağa qadir güclü bir dövlət olduğu bütün dünyaya göstərildi.

Prorektor əldə olunan bu şanlı qələbədə məzunlarımız olan hərbi həkimlərin misilsiz fədakarlığından söhbət açıb. Qeyd edib ki, cəsur həkimlərimiz həyatlarını risk altına ataraq yaralılara kömək edib və onların bəziləri qəhrəmanlıqla şəhid olub.

Daha sonra Əczaçılıq fakültəsinin dekanı, dosent Fərəh Mədətli və Vətən müharibəsi qazisi, polkovnik-leytenant Dəyanət Məmmədov Qələbəmizi səciyyələndirən amillər barədə fikirlərini bölüşüb, tarixi Zəfərin Ali Baş Komandanımız İlham Əliyevin qüdrətli sərkərdəliyi və xalqımızın birliyi nəticəsində ərsəyə gəldiyi bildiriblər.

Sonra söz məruzəçi tələbələrə verilib. Leyla Ağabəyli “Tarixi qələbəmiz”, Fatimə Rəsulova “Göz yaşı içində gülüş - Zəfər Günümüz”, Saçlı Cəfərova “Qəhrəmanlıqla taclanan Zəfər bayramı”, Aytən Namazlı “44 günlük müharibə - Dəmir yumruq”, Elmir Mirzəyev “2-ci Qarabağ müharibəsi: Şanlı Zəfər tariximiz”, Rəsul Bünyatov “Görünməyən qəhrəmanlar - Ağxalatlılar” və Ofelya Məmmədova “2020-ci ilin 8 noyabrı Zəfər Günümüzdür” mövzusunda məruzələrlə çıxış ediblər.