Azərbaycan Tibb Universitetinin (ATU) rektoru, professor Gəray Gəraybəyli 2022/2023-cü tədris ili üçün universitetə qəbul olan Prezident təqaüdçüləri ilə görüşüb.

Universitetin mətbuat xidmətindən Aztibb.az-a bildirilib ki, rektor əldə etdikləri yüksək nəticə münasibətilə tələbələri təbrik edərək Prezident təqaüdünə layiq görülmələrinin onlar üçün həm qürur, həm də böyük məsuliyyət olduğunu bildirib.
G.Gəraybəyli gənclərin məhz Azərbaycan Tibb Universitetinə qəbulunun ikiqat qürurlu olduğunu qeyd edib: “Zəngin təhsil ənənələrinə malik olan 92 illik tarix sahibi Tibb Universiteti hər zaman Azərbaycanda ali təhsil ocaqları arasında seçilməyi bacarıb. Hər il bizim universitetə onlarla qabaqcıl abituriyent daxil olur. İmtahanlarda yüksək bal toplamış abituriyentlərin böyük qismi ATU-nu seçir. Gələcəkdə seçiminizi layiqincə doğruldacağınıza, xalqımız, dövlətimiz üçün layiqli, peşəkar mütəxəssislər kimi yetişəcəyinizdən əminəm”.

Rektor G.Gəraybəyli daha sonra ATU-da tədris sistemi, təhsil proqramında yeniliklər barədə də tələbələrə məlumat verib. O, tələbələri universitetin ictimai həyatında aktiv iştirak etməyə çağıraraq gənclərə uğurlar arzulayıb.

Qeyd edək ki, 2022/2023-cü tədris ilində 23 nəfər Prezident təqaüdçüsü Azərbaycan Tibb Universitetinə qəbul olub.