Oktyabrın 14-də ATU-nun Tədris Cərrahiyyə Klinikasında "Diabetik nefropatiya” mövzusunda növbəti seminar keçirilib.

Mühazirədən öncə klinikanın rezidentlər üzrə məsul şəxsi, Uşaq cərrahlığı kafedrasının assistenti Namiq Xəlilov və universitetin Rezidentura və magistratura şöbəsinin müdiri, professor Məlahət Sultanova çıxış edərək müzakirəyə çıxarılan mövzunun aktuallığından bəhs ediblər. Bu sahə üzrə aparıcı mütəxəssis, III Daxili xəstəliklər kafedrasının assistenti və hemodializ bölümünün rəhbəri Barat Yusubovun adıçəkilən mövzuda mühazirəsinin rezidentlər üçün faydalı olacağı vurğulanıb.

Daha sonra Barat Yusubov "Diabetik nefropatiya” mövzusunda məruzəsini təqdim edib. Həkim rezidentlərə müraciətlə qeyd edib ki, hansı sahədə işləməyinizdən asılı olmayaraq, qəbulunuza gələn xəstələrin ən azı 20-30 faizi bu xəstəlikdən əziyyət çəkən insanlar olacaq və yaxud şəkərli diabet fonunda hansısa patologiya ilə rastlaşacaqsınız.

O, diabetik nefropatiyanın - şəkərli diabetdən qaynaqlanan böyrəkdə struktur (mezengial genişlənmə, bazal membranda qalınlaşma, qlomeruloskleroz) və funksional dəyişikliklər (albuminuriya və irəliləyən böyrək çatışmazlığı) toplusu olduğunu diqqətə çatdırıb. Eyni zamanda, diabetik nefropatiyanın epidemiologiyası, patogenezi, hemodinamik mexanizmi haqqında məlumat verib.

Nefroloq həkim xəstəliyin diaqnostikasında və laborator müayinələrində elə bir dəyişiklik olmadığından, diqqəti daha çox risk faktorlarina, müalicədəki yeniliklərə yönəldib. Onun sözlərinə görə, fiziki aktivlik və tütün məhsullarından imtina da diabetik nefropatiyanın müalicəsinə müsbət təsir göstərən amillərdəndir: "Həmçinin düzgün qidalanmanın xüsusi əhəmiyyəti var. Zülalın azaldılması ilə hiperfiltrasiyanın qarşısı alına bilər. İdeal günlük zülal qəbulu 0,8 qram, günlük natrium qəbulu 2 qramdan az olmalıdır”.

Məruzəçi bildirib ki, şəkərli diabet xəstələrində aterosklerotik ağırlaşmalara digər xəstələrlə müqayisədə 2-4 dəfə artıq rast gəlinir. Bunun səbəbi isə həmin xəstələrdə daha çox rast gəlinən dislipidemiyadır.

“Diabetin aşkarlandığı andan lipid profili yoxlanılmalıdır. Statin başlanarsa, müalicədən öncə QC transaminazalara baxılmalı və 3 ay sonra kontrol olunmalı, müalicə sonrası QC transaminazaları normanın yuxarı sərhədindən 3 dəfə və daha çox artarsa, dərman kəsilməlidir”, -deyə Barat Yusubov bildirib.

Mühazirə zamanı o da vurğulanıb ki, bütün növ diabet xəstələrində nefropatiyanın qarşısını almaq və ya yaranmış zədələnmənin proqressivləşməsinin reqressiyası üçün mütləq şərtlərdən biri də optimal qlikemik kontroldur. Bundan əlavə, arterial təzyiqin nəzarətdə saxlanılması da diabetik nefropatiya riskini azaldır.

Həkim, həmçinin xroniki böyrək xəstəliyinin son mərhələsində olan xəstələr üçün ən uyğun müalicə üsullarını da açıqlayıb.

İnteraktiv seminarda məruzə ətrafında müzakilər aparılıb, rezidentlərin mövzuya dair çoxsaylı sualları cavablandırılıb.