Naxçıvan Muxtar Respublikası səhiyyə nazirinin müavini, nazir vəzifələrini müvəqqəti icra edən Rəşadət Nabatov tərəfindən Babək rayonunda növbəti vətəndaş qəbulu keçirilib.

Naxçıvan MR Səhiyyə Nazirliyindən Aztibb.az-a bildirilib ki, qəbul zamanı vətəndaşların səhiyyə sahəsi ilə bağlı müraciətləri, təklif və şikayətləri dinlənilib.

Qəbul çərçivəsində ümumilikdə 38 nəfər vətəndaşın müraciəti qeydə alınıb.

Vətəndaşların müraciətləri əsasən tibbi xidmətlərin təşkili, müalicə və müayinələrin aparılması, işlə təminat, eləcə də səhiyyə sahəsinə aid digər məsələlərlə bağlı olub.
Qaldırılan məsələlərin bir qismi yerində həllini tapıb, araşdırma tələb edən müraciətlərlə bağlı isə müvafiq tapşırıqlar verilib və icrası nəzarətə götürülüb.
Keçirilən bu cür qəbullar regionlarda vətəndaşların səhiyyə xidmətlərinə əlçatanlığının artırılması, mövcud problemlərin operativ həlli və vətəndaş məmnunluğunun yüksəldilməsi baxımından mühüm əhəmiyyət daşıyır.