7-8 noyabr 2020-ci il tarixlərində Bakı şəhərində "Ürək çatışmazlığının multi-modal diaqnostik görüntüləmə ilə inteqrasiyası" mövzusunda beynəlxalq konfrans keçiriləcək. Azərbaycan Tibb Universiteti (ATU) və "Uptodate İn Medicine" tərəfindən təşkil ediləcək konfrans Azərbaycan Tibb Universitetinin Jurnalı və Avrasiya Klinik Elmlər Jurnalı tərəfindən dəstəklənir.
Kardioloqlar, kardio-cərrahlar, qeyri-invaziv və invaziv ürək-damar görüntüləməsi ilə məşğul olan mütəxəssislərin bir araya gələcəyi bu mühüm elmi-praktik konfransda kardiologiyada, xüsusilə də ürək çatışmazlığında multimodal görüntüləmə texnologiyalarına dair maraqlı müzakirələr aparılacaq. Mühazirələr, panel müzakirələri və sual-cavab sessiyaları vasitəsilə iştirakçılar, o cümlədən mütəxəssislər və ümumi praktika həkimləri çoxmodallı, qeyri-invaziv və invaziv ürək-damar görüntülənməsi sahəsində mövcud texnologiyalara dair yeni məlumatlar əldə edəcək, qabaqcıl görüntüləmə texnologiyalarının cari tətbiqləri barədə yeni biliklərə yiyələnəcəklər. Konfransda hər bir görüntüləmə metodundan düzgün istifadə üçün mövcud tövsiyələr nəzərdən keçiriləcək, yeni texnologiyaların pasiyentin müalicəsinə, habelə səhiyyə xərclərinə təsiri dəyərləndiriləcək.
İnteraktiv didaktik sessiyalarla yanaşı, iştirakçılar konfrans öncəsi seminarlarda öz bacarıqlarını praktik məşğələlər və kiçik qrup seminarları ilə artırmaq imkanı əldə edəcəklər.
Qeyd edək ki, konfransla paralel olaraq Beynəlxalq Gənc Kardiologiya Akademiyasının toplantısı da keçiriləcək.