Azərbaycan Tibb Universitetində “Studentvision” musiqi layihəsinə start verilib. Aztibb.az xəbər verir ki, Nərimanov rayon İcra Hakimiyyəti tərəfindən təşkil olunan bu layihənin məqsədi musiqi sahəsində istedadı və qabiliyyəti olan tələbələri üzə çıxarmaq və onların beynəlxalq musiqi yarışmalarında iştiraklarını təmin etməkdir.

Layihə rəhbəri, İdman Akademiyasının tələbəsi Murad Süleymanlı və ATU-nun tələbəsi Dilbər Rahim Əliyevanın təqdimatında tədbir böyük maraqla qarşılanıb. 

D.R.Əliyeva “Studentvision” layihəsinin 3 ilə yaxındır ki, təsis olunduğunu və bir neçə müsabiqə yarışması təşkil etdiklərini bildirib:

“2021-ci ildə keçirilən bu layihədə universitetimizin tələbəsi Aliyə Şahbazova finala yüksəlib. Ona görə də ATU bu gün ev sahibliyi edir. Hazırkı müsabiqənin müxtəlif universitetlərdən olan iştirakçılarına uğurlar arzulayıram”.

Aparıcılar ev sahibliyinə görə ATU-nun rəhbərliyinə, maliyyə dəstəyinə görə Nərimanov Rayon Gənclər və İdman İdarəsinə təşəkkür ediblər. Daha sonra iştirakçılar səhnəyə çıxıb. Onların ifası münsiflər heyəti tərəfindən ayrı-ayrılıqda dəyərləndirilib.

2021-ci ilin finalçısı, universitetimizin I Müalicə profilaktika fakültəsinin 5-ci kurs tələbəsi Aliyə Şahbazova da öz bənzərsiz ifası ilə zalda əyləşənləri heyran edib. Onun ifasında “When the Music Dies” mahnısı tamaşaçı alqışlarına səbəb olub.

Qeyd edək ki, müsabiqədə ölkəmizdə fəaliyyət göstərən 10-a yaxın universitetin tələbələri iştirak edib. Sosial şəbəkədə səsvermə yolu ilə 12 nəfər tələbədən 8-i finala vəsiqə qazanıb. Qalib müəyyənləşənədək müsabiqənin mərhələli şəkildə davam etməsi nəzərdə tutulub. Müsabiqənin münsiflər heyətində Aslan Rüstəmzadə, Rəvanə Vəliyeva, Nihad Məmmədov, Minayə Hüseynova, Nadir Rüstəmli təmsil olunurlar.