Referans Klinik Laboratoriya Mərkəzi və Poliklinikanın ginekoloqu Mələk Qafarlı koronavirusun (COVID-19) hamilə qadınlara və körpələrə təsiri ilə bağlı suallarımıza aydınlıqlıq gətirib.

Aztibb.az müsahibəni təqdim edir:

- Mələk xanım, hamilə qadınların virusa yoluxma riski daha çoxdurmu?

- Hamilə qadınların COVID-19-a yoluxma riski yüksək deyil. Lakin virusa yoluxmuş hamilə qadının ağırlaşma və intensiv terapiyaya ehtiyac duyma riski daha çoxdur. Xüsusilə yoluxma hamiləliyin 3-cü trimestrində baş verərsə risk yüksəkdir.

- COVID-19 hamiləliyə və doğulacaq körpəyə necə təsir edir?

- Araşdırmalara görə, COVID-19 dölün inkişafına mənfi təsir göstərmir və döldə qüsurların olması ehtimalını artırmır. Həmçinin yoluxma erkən həftələrdə baş verərsə düşük ehtimalı da artmır.

- Koronavirusa yoluxmaq doğuş zamanına və şəklinə təsir edirmi?

- COVID-19 doğuş zamanına və şəklinə təsir göstərmir. Lakin əgər hamilə qadının vəziyyəti ağırdırsa və həyatı üçün təhlükə varsa, bu zaman hamiləliyi normal doğuşla deyil, qeysəriyyə əməliyyatı ilə başa vurmaq məsləhətdir. Hətta lazım gələrsə vaxtından əvvəl sonlandırmaq da olar.

- Hamilə qadınlar koronavirusdan qorunmaq üçün nə etməlidir?

- İlk öncə sıx məkanlardan uzaq durmalı, qoruyucu maskalardan istifadə etməli və sosial məsafəni qorumağa diqqət etməlidirlər. İmmun sistemini yüksək tutmaq üçün isə sağlam qidalanma, düzgün yuxu rejimi, təmiz havada gəzinti və vitamin-mineral balansını normada saxlamaq lazımdır.