Akademik M.A.Topçubaşov adına Elmi Cərrahiyyə Mərkəzinin Qaraciyər, ödkisəsi və mədəaltı vəzi xəstəliklərinin cərrahlığı şöbəsinin baş elmi işçisi, tibb elmləri doktoru Zərraf Şirinov Azərbaycan Respublikasının Prezidenti yanında Ali Attestasiya Komissiyasının 28.01.2022-ci il tarixli qərarı ilə tibb elmləri sahəsində “Cərrahlıq” ixtisası üzrə professor elmi adını alıb.

Aztibb.az xəbər verir ki, Zərraf Şirinov 1997-ci ildə Azərbaycan Tibb Universitetində "Xora mənşəli piloroduodenal stenozlar zamanı mədə rezeksiyası və ya vaqotomiya" mövzusunda namizədlik, 2005-ci ildə isə Rusiya Federasiyasının Xalqlar Dostluğu Universitetində "Əməliyyat olunmuş mədənin xəstəliklərinin diaqnostikası və cərrahi müalicəsi" mövzusunda doktorluq dissertasiyalarını müdafiə etmişdi. Alimin apardığı tədqiqatlar nəticəsində əməliyyat olunmuş mədənin xəstəliklərinin - patoloji sindromların yeni təsnifatı təklif olunmuş, ayrı-ayrı patoloji sindromların korreksiyası üçün yeni cərrahi üsullar işlənib hazırlanmış və kliniki təcrübədə tətbiq olunmuşdur. Yeniliyə görə bu üsullardan üçünə Rusiya Federasiyasının patenti verilmişdir.

Zərraf Şirinov 170-dən artıq elmi məqalə və tezisin, həmçinin iki monoqrafiyanın müəllifidir. Onun rəhbərliyi ilə 4 fəlsəfə doktoru hazırlanmışdır.