Zahılıq dövrünün infeksion iltihabi ağırlaşmaları mövzusunda elmi monoqrafiya çap olunub
11.01.2022 10:22

“Zahılıq dövrünün infeksion iltihabi ağırlaşmalarının erkən proqnozlaşdırılması və profilaktikasının müasir aspektləri” adlı elmi monoqrafiya çapdan çıxıb.

 

Elmi-Tədqiqat Mamalıq və Ginekologiya İnstitutunun Ginekologiya şöbəsinin müdiri, tibb üzrə fəlsəfə doktoru, dosent Fatma Hacıyevanın müəllifi olduğu kitab Səhiyyə Nazirliyinin müvafiq əmri ilə nəşr olunub.

 

Müəllif uzunmüddətli və gərgin elmi praktiki əməyinin bəhrəsi olan kitabda zahı qadınlarda infeksion proseslərin gedişatını, klinikasını, risk faktorlarını, müayinə və müalicə tədbirlərini tədqiq edib. Kifayət qədər böyük xəstə qrupu üzərində aparılan tədqiqat işinin elmi əsaslandırılması məqsədilə riyazi statistika üsullarına əsasən hesablama və təhlillər qurulub.

 

F.Hacıyeva tibbi biologiyada məlum olan yeni metod - Raman spektroskopiyası vasitəsilə həmin qrup qadınlar üzərində infeksion proseslərin tədqiqi istiqamətində yüksək nəticələr əldə edib. Müəllif yüksək effektivlik və informativlik, eləcə də qeyri-invazivlik baxımından bu metodun zahı qadınlarda infeksion, iltihabi proseslərin təyin edilməsində tətbiqinin məqsədəuyğunluğunu təsdiq edib.

 

Kitab elmi monoqrafiya olaraq, mamalıq və ginekologiyanın aktual məsələsi olan doğuşdan sonrakı ağırlaşmaların profilaktikasına həsr edilib. Monoqrafiya elmi yeniliyi, praktik əhəmiyyəti baxımından müasir mama-ginekoloqlar, eləcə də tibb sahəsində ali və orta ixtisas təhsili alan tələbələr üçün nəzərdə tutulub.