ATU-da iki yeni kafedra yaradılıb
07.01.2022 13:44
Azərbaycan Tibb Universitetində (ATU) müasir dövrün tələblərinə uyğun olaraq iki yeni kafedra yaradılıb.
 
Aztibb.az xəbər verir ki, bu barədə ATU-nun Tədris və təhsildə keyfiyyət təminatı şöbəsinin müdiri, dosent Samir Cavadov məlumat verib.
 
Şöbə müdiri bildirib ki, təhsil nazirinin müvafiq əmri ilə təsdiq edilmiş yeni Təhsil Proqramının peşə kompetensiyaları, proqramın təlim nəticələri ilkin səhiyyə xidmətinə uyğun hazırlanıb, peşə profilində məzunların ilkin səhiyyə xidmətində fəaliyyət göstərməsi nəzərdə tutulub. Proqramın dünyanın qabaqcıl ali təhsil müəssisələrinin tədris proqramlarına uyğunlaşdırılması məqsədilə 2022-2023-cü tədris ilindən etibarən “Təcili tibb” kafedrasının yaradılması məqsədəuyğun hesab edilib.
 
S.Cavadovun sözlərinə görə, beynəlxalq arenada olduğu kimi, Azərbaycanda da elm sahəsində tibb təhsilinin inkişafına töhfə verən, akademik tədqiqatlar aparan insan gücünün hazırlanmasına ehtiyac var. Bu proqramlar, eyni zamanda sağlamlıq elmlərinin stomatologiya, tibb bacısı, əczaçılıq kimi sahələrində də təhsil istiqamətli mütəxəssislərin hazırlanmasına kömək edir. Bütün bunlar universitetdə “Tibb və sağlamlıq elmləri təhsili” kafedrasının yaradılmasını zərurətə çevirib.
 
Qeyd edək ki, adları çəkilən kafedraların yaradılması barədə məsələ Tədris və təhsildə keyfiyyət təminatı şöbəsinin təqdimatı ilə Böyük Elmi Şuranın müzakirəsinə çıxarılıb. Elmi şuranın üzvləri hər iki kafedranın yaradılmasına razılıq veriblər.