COVID-19-la bağlı beynəlxalq təcrübəyə əsaslanan təlim keçirilib 
31.08.2020 11:36

14-27 iyul 2020-ci il tarixlərində Koreya Beynəlxalq Əməkdaşlıq Agentliyi (KOICA) və Yönse Universiteti tərəfindən “Tibb mütəxəssislərinin infeksion xəstəliklər üzrə bilik və bacarıqlarının təkmilləşdirilməsi: COVID-19 test dəstinin istifadəsi” mövzusunda təlim təşkil olunub.

 

Aztibb.az xəbər verir ki, təlimin iştirakçısı olan Qəbələ özəl sanatoriyasının Tibbi Biokimya Laboratoriyasının müdiri, “FLM” Laboratoriya Mütəxəssisləri və Təşkilatları Assosiasiyasının üzvü Ramil Alməmmədov təəssüratlarını bölüşüb:

 

“Təlimdə fərdi mühafizə vasitələrindən düzgün istifadə, koronaviruslu xəstələrin tibb müəssisələrinə qəbul edilməsi, onların tənəffüs yollarından yaxma nümunələrinin düzgün və təhlükəsiz götürülməsi və daşınması qaydalarına həsr olunan modullar xüsusilə informativ idi. Həmçinin Koreya Respublikası və Böyük Britaniyada xəstələrin qruplaşdırılması və vəziyyətlərinin qiymətləndirilməsi üçün istifadə olunan cədvəllər təqdim edilmişdi.

 

Koronavirusla mübarizə apardığımız bu dövrdə tibb işçilərinin hərtərəfli maarifləndirilməsində təlimlərin rolu böyükdür. Belə bir təlimin keçirilməsinə görə, təlimin təşkilatçılarına və azərbaycanlı tibb işçilərinin təlimə qatılmasında xüsusi rolu olan İcbari Tibbi Sığorta üzrə Dövlət Agentliyinə təşəkkürümü bildirirəm. Ümid edirəm, yaxın gələcəkdə həkim və tibb işçilərimiz üçün yenidən bu cür maraqlı və beynəlxalq təcrübəyə əsaslanan təlimlərə qatılmaq imkanı yaradılacaq”.

 

Qeyd edək ki, təlimin videoçarxları ilə ilin sonunadək İcbari Tibbi Sığorta üzrə Dövlət Agentliyinin "Facebook" və "Youtube" platformalarında tanış olmaq mümkündür. Modullardan istifadə ödənişsizdir.