Mərkəzi Gömrük Hospitalının rezidenti Aydan Əsədli təhsilini müvəffəqiyyətlə başa vurub.

Aztibb.az xəbər verir ki, oktyabrın 1-də Mərkəzi Gömrük Hospitalında rezidentura təhsili alan rezidentlərdən iki nəfəri təhsilini uğurla başa vurub. Onlardan biri Aydan Əsədlidir.

Rezident Aydan Əsədli 2017-ci ildə Naxçıvan Dövlət Universitetini bitirib, 2018-ci ildə isə Azərbaycan Dövlət Tibb Universitetinin nəzdində fəaliyyət göstərən Mərkəzi Gömrük Hospitalının "Anesteziologiya-reanimatologiya" ixtisasına qəbul olub. O, Hospitalın Anesteziologiya və Reanimasiya şöbəsinin rəisi Tural Sadıqovun kuratorluğu ilə bu ixtisasın incəliklərinə dərindən yiyələnib, şöbənin digər həkimlərinin biliklərindən faydalanıb.

Mərkəzi Gömrük Hospitalında təcrübə keçdiyi 3 il ərzində o, öz bilik və bacarıqlarını xeyli artırıb, zəngin təcrübə əldə edib. Belə ki, Hospital COVID-19 infeksiyası ilə mübarizəyə başladığı gündən etibarən Anesteziologiya və Reanimasiya şöbəsində xəstələrin sağlamlığına qovuşması üçün əlindən gələni edib, bu mübarizədə Aydan Əsədli də yaxından iştirak edib.

“Mən Mərkəzi Gömrük Hospitalında peşəkar komandanın bir üzvü kimi çalışdığım üçün özümü şanslı hesab edirəm. Çünki burada peşəkar həkimlərin təcrübəsindən yararlanmaq və ən müasir avadanlıqlarla işləmək imkanımız var idi. Buna görə də əminəm ki, Mərkəzi Gömrük Hospitalında aldığım rezidentura təhsili gələcək işimdə mənə böyük kömək olacaq", - deyə o, MGH-nin kollektivinə minnətdarlığını ifadə edib.