Rezidenturaya qəbul olmaq üçün namizədlərin imtahanlara daha səmərəli və sərbəst hazırlaşmaları məqsədilə Dövlət İmtahan Mərkəzi tərəfindən mütəmadi olaraq elmi-metodik vəsaitlər nəşr olunur.

Bu barədə “Rezidentura” jurnalının 3-cü nömrəsində məlumat verilib. Bildirilib ki, belə nəşrlərdən Azərbaycan və rus dillərində “İnsan anatomiyası”, “Bioloji kimya” , “Patoloji fiziologiya”, “Histologiya” (sitologiya, embriologiya, ümumi və xüsusi histologiya), “Normal fiziologiya”, “Baza fənləri üzrə test toplusu” (topluda olan test tapşırıqlarından 20 faizinin qəbul imtahanlarına düşmə ehtimalı var), “Baza fənləri üzrə test tapşırığı nümunələri və onların izahı” elmi-metodik vəsaitləri göstərmək olar. Hazırda bu istiqamətdə işlər davam etdirilir. Belə ki, Azərbaycan və rus dillərində “İxtisas fənləri üzrə test toplusu” elmi-metodik vəsait nəşrə hazırlanır və yaxın günlərdə oxuculara təqdim olunacaq.

Rezidenturaya qəbul imtahanlarına hazırlaşan namizədlərə dərsliklərdəki materialları öyrənməklə yanaşı, həm də ümumiləşdirmə aparmaq, biliklərini sistemləşdirmək və tətbiq etmək qabiliyyətlərini də inkişaf etdirmək tövsiyə olunur. Baza ali tibb təhsili verən təhsil müəssisələrində isə tələbələrin məntiqi düşünmə, nəzəri bilikləri tətbiqetmə bacarıqlarının inkişaf etdirilməsinə diqqət artırılmalıdır.