Aztibb.az xəbər verir ki, bu günlərdə birgə tədqiqatların nəticəsi olaraq Milli Onkologiya Mərkəzinin baş direktoru, akademik Cəmil Əliyev, Biofizika İnstitutunun baş direktoru, AMEA-nın müxbir üzvü Oktay Qasımov, AMEA-nın Biofizika İnstitutunun elmi işçi Arzu Aydəmirova, Milli Onkologiya Mərkəzi-AMEA Biofizika İnstitutunun birgə laboratoriyasının həmrəhbəri Leylaxanım Məlikovanın həmmüəllifliyi ilə “Süni İntellekti qan plazmasının FÇİQ spektrlərinə tətbiq etməklə insan ağciyər xərçənginin klassifikasiyası” adlı məqaləsi impakt faktoru 3.898 (Clarivate Analytics, 2020) olan “Applied and Computational Mathematics” jurnalında çap edillib. (Appl. Comput. Math, 2021, v.20, 277-289).

 

Qeyd edək ki, bu iş AMEA-nın Fizika-Riyaziyyat və Texnika Elmləri Bölməsi, Biologiya və Tibb Elmləri Bölməsi və Rəyasət Heyətinin iclaslarında geniş müzakirə edilib və elmi-ictimaiyyət tərəfindən yüksək qiymətləndirilib.

 

Məqalədə göstərilib ki, süni intellekti sağlam və ağciyər karsinoması xəstələrinin qan plazmalarının FÇİQ spektrlər toplusunun analizinə tətbiqi ilə yaradılan model sağlam və xəstə nümunələri 80-90% dəqiqliklə klassifikasiya etməyə imkan verir. Hazırda bu iş AMEA-nın Biofizika və Milli Onkologiya Mərkəzinin birgə səyi ilə daha da inkişaf etdirilir. Məqsəd maşın öyrənməsini genişləndirməklə xərçəngin klassifikasiyasını daha da təkmilləşdirmək və qeyri-invaziv skrininq metodu kimi ağciyər xəstələrini erkən aşkar edilməsinə tətbiq etməkdir.