Maqnezium bədənimizdə ən çox yayılmış dördüncü mineraldır. Maqneziuma ürək, əzələlər və böyrəklər daha çox ehtiyac duyur.

Aztibb.az xəbər verir ki, orqanizmin 300-dən artıq fermentində maqnezium var. Maqneziumun 50-60%-i sümüklərdə, qalan hissəsi isə yumşaq toxumalarda olur. Bu mineral bədəndə züllaların, yağların və karbohidratların həzm olunması və parçalanmasında yardımçı olur. Odur ki, bu maddənin çatışmazlığı ciddi xəstəliklərə səbəb ola bilər.

Maqnezium çatışmazlığının əlaməti yorğunluq hissi, ürək fəaliyyətində pozğunluq, qıcolmalar və əzələ ağrıları ilə müşahidə olunur. Bundan əlavə, göz səyirməsi və əzələ spazmları da bu maddənin çatışmazlığının göstəricisidir.

DNT-nin sintezi maqneziumum köməyilə reallaşır. Ona görə də orqanizmdə maqnezium kifayət qədər deyilsə, sistit, bağırsaq xəstəliyi, baş ağrısı, yuxusuzluq, ürək-damar xəstəlikləri, hipertoniya, diabet, osteoporoz və s. kimi xəstəliklər ortaya çıxır.

Maqnezium çatışmazlığı ilə mübarizənin ən etibarlı üsulu qida rasionuna maqneziumla zəngin məhsulları daxil etməkdir.

Yaşıl tərəvəzlər yüksək dərəcədə maqnezium tərkibinə malikdir. Lobya, avakado, qoz, küncüt toxumları və günəbaxan tumları da mükəmməl maqnezium mənbələridir.

Maqnezium çatışmazlığı çox vaxt orqanizmdən onun xaric olunması nəticəsində baş verir. Həddindən artıq spirtli içki, şirniyyat, qəhvə qəbulu, həzm sisteminin yaxşı fəaliyyət göstərməməsi, eləcə də bir çox dərmanlardan istifadə maqneziumun sorulmasına əsas yaradır.