Son illərdə Azərbaycanda metanol və digər alkohol surroqatları ilə zəhərlənmə hallarının kəskin artması müşahidə olunur. Lakin indiyədək bu ağır toksikoloji patologiyanın diaqnostika və müalicəsi üzrə Azərbaycan dilində ixtisaslaşdırılmış ədəbiyyat mövcud olmayıb.

 

Aztibb.az xəbər verir ki, bu nöqsanı aradan qaldırmaq üçün “Alkohol surroqatları ilə zəhərlənmələr” adlı metodik vəsait hazırlanıb və Ümümdünya Səhiyyə Təşkilatının dəstəyi ilə nəşr olunub. 

 

Metodik vəsait suallar və cavablar formatında tədqim olunur, metanol və digər alkohol surroqatları ilə kəskin zəhərlənmələr zamanı ardıcıl diaqnostika və müalicə tədbirlərinin ətraflı təsvirini əhatə edir.

 

Vəsait təcili tibbi təxirəsalınmaz yardım həkimləri, ilkin səhiyyə sistemində çalışan tibb işçiləri, qeyri-ixtisaslaşdırılmış stasionar təcili tibbi yardım mütəxəssisləri, eləcə də həkim-reanimatoloqlar, ailə həkimləri və həkim-rezidentlər üçün nəzərdə tutulub.

 

Metodik vəsaitin ödənişsiz nüsxəsini Toksikologiya Mərkəzindən əldə etmək olar.

 

Nəşrin müəllifi Azərbaycan Tibb Universitetinin Daxili xəstəliklər kafedrasının dosenti, tibb üzrə fəlsəfə doktoru İsmayıl Əfəndiyevdir.