Yaz-yay aylarında uşaqlar arasında ən çox yayılan xəstəlik allergiyadır. Bu mövsümün aktual allergik xəstəlikləri qida səbəbindən və həşəratların dişləməsi ilə baş verir.

Aztibb.az xəbər verir ki, uşaqlarda allergiyanın əsas törədiciləri qida və nəfəslə qəbul edilən törədicilərdir.  Allergik reaksiyaya süd və süd məhsulları, yumurta, yerfındığı yağı, apelsin, şokolad, pomidor, balıq və  toz gənələri, çiçək tozcuqları, heyvan tükləri, kif səbəb ola bilir. Bu hal boyayıcılarla və konservantlarla zəngin olan konfetlər, souslar, dondurma və peçenye yedikdən sonra da yarana bilər.

Müxtəlif həşəratlar uşaqları sancarkən və ya dişləyərkən onların ağız suyuna, zəhərinə və digər hissələrinə güclü allergik reaksiyalar baş verir. Ən çox və ağır allergik reaksiyalar arı sancmaları zamanı müşahidə olunur. Çox zaman sancmalar şokla nəticələnir.

Mövsümi allergiya bitkilərin tozlanması zamanı da qeydə alınır. Pollinoz adlanan bu xətəlik zamanı uşaqlarda bitki tozuna həssaslıq nəticəsində bir sıra orqanların kəskin allergik iltihabı baş verir.

Həmçinin, yayda uşaqlarda gözün allergik konyunktiviti ən çox rast gəlinən xəstəliklərdəndir.

Xüsusilə mövsümdə ağac, bitki və meyvələrin xəstəliklərinin qarşısını almaq məqsədilə itifadə edilən dərmanlar bu məhsulların allergenliyini artırır. Bu səbəbdən allergiyaya meyilli və ya hər hansı allergik xəstəlikdən əziyyət çəkən uşaqlara belə məhsullar məsləhət görülmür.

Uşaqlarda xəstəliklərin təzahürü zamanı ən çox rast gələn simptomlar isə qusma, yeməkdən imtina, ishal, zökəm, asqırma, tənəffüs və ya öskürək zamanı səsin dəyişməsi, uzunmüddətli və daimi öskürək,dəridə səpkilər,pis yuxu, tez-tez ağlama, baş ağrıları və sairdir.