Avqustun 4-dən etibarən Azərbaycan Tibb Universitetinin (ATU) II Müalicə profilaktika fakültəsində yay semestrinə start verilib.
Aztibb.az xəbər verir ki, fakültənin dekanı İsrail Məhərrəmbəylinin sözlərinə görə, yay semestrinin məqsədi tələbələrin müvəffəqiyyət qazandıqları fənlərdən qiymətlərinin artırılmasına imkan yaratmaqdır.
Yay semestrində tələbələr İnsan anatomiyası, Histologiya, Farmakologiya, Biofizika kimi fənlər üzrə hazırlaşırlar. Ümumilikdə 22 tələbə yay semestrində iştirak üçün müraciət edib. Onlardan 7-si iki fənn üzrə semestrə qatılıb.
Yay semestrinin təşkilinə, dərslərin nizam-intizamlı keçirilməsinə univeristet rəhbərliyi və fakültə dekanlığı tərəfindən ciddi nəzarət olunur.
İnsan anatomiyası və tibbi terminologiya kafedrasının baş müəllimləri Gülnarə Kərimzadə və Ülviyyə Cəfərova, Sitologiya, embriologiya və histologiya kafedrasından assistent Səbinə İsrafilova, Farmakologiya kafedrasından baş müəllim İlqar Tahirov, Bioloji kimya kafedrasından baş müəllim Xəyalə Məmmədova yay semestrinin tədrisinə cəlb olunublar.
Akademik təqvim üzrə yay semestrinin 4 avqust - 7 sentyabr tarixləri aralığında keçirilməsi nəzərdə tutulur. Sentyabrın 8, 9 və 11-də semestr iştirakçıları üçün onlayn imtahan sessiyası təşkil olunacaq.
