Almaniya-Azərbaycan Radioloji və Neyroradioloji Cəmiyyəti azərbaycanlı gənclərə təqaüd ayıracaq.
Bu barədə təşkilatın sədri, Köln Universiteti Klinikasının şöbə müdiri, tibb elmləri doktoru Nuran Abdullayev məlumat verib.
O, bildirib ki, pandemiyanın yaratdığı çətinliklər aradan qalxandan sonra təqaüdə rəsmi müraciət edilməsi üçün elan veriləcək:
“Azərbaycanlı gənc həkimlərin neyroradiologiya sahəsinə və insult xəstələrinin müalicəsinin Almaniyadakı təşkilinə marağını nəzərə alaraq Almaniya-Azərbaycan Radioloji və Neyroradioloji Cəmiyyətinin sədri olaraq təşkilatımız adından bir neçə nəfərə təqaüd ayırmağı qərara aldıq. Onları Almaniyadakı neyroradiologiya sistemi ilə tanış olmaq üçün buraya gətirməyi düşünürük”.
N.Abdullayev qeyd edib ki, təqaüd üçün rezidentlər, gənc həkimlər və insult xəstəliyinin müalicəsi ilə məşğul olan digər ixtisas sahibləri müraciət edə biləcəklər. Təqaüdə müraciətlərin ildə bir dəfə olacağı nəzərdə tutulur. Gələn şəxslərə Almaniyada elmi işlərdə birbaşa iştirak şansı da təklif ediləcək.