Belarus Respublikasının Minsk Cərrahiyyə, Transplantasiya və Hematologiya Elmi-Praktiki Mərkəzinin nümayəndə heyəti Bakı Sağlamlıq Mərkəzini ziyarət edib.
Bu barədə Aztibb.az-a Bakı Sağlamlıq Mərkəzindən xəbər verilib.
Bildirilib ki, nümayəndə heyətinin tərkibində Minsk Cərrahiyyə, Transplantasiya və Hematologiya Elmi-Praktiki Mərkəzinin direktoru, Belarus Respublikası Milli Assambleyası Respublika Şurasının üzvü (senator) Oleq Rummo və digər mütəxəssislər yer alıblar.
Səfər zamanı qonaqlara Bakı Sağlamlıq Mərkəzinin fəaliyyəti, burada yaradılmış müasir tibbi infrastruktur, pasiyentlərə göstərilən ixtisaslaşmış tibbi xidmətlər və tətbiq olunan müasir müalicə üsulları barədə ətraflı məlumat verilib.
Görüş çərçivəsində orqan donorluğu və transplantasiyası sahəsində təcrübə mübadiləsi, mütəxəssislər arasında əməkdaşlığın genişləndirilməsi, qarşılıqlı peşəkar səfərlərin təşkili və elmi-praktik əlaqələrin inkişaf perspektivləri ətrafında fikir mübadiləsi aparılıb.
Belarus nümayəndə heyəti Bakı Sağlamlıq Mərkəzində yaradılmış şərait və tibbi xidmətlərin təşkili ilə yaxından tanış olub. Tərəflər gələcəkdə qarşılıqlı əməkdaşlığın davam etdirilməsinin və peşəkar əlaqələrin daha da inkişaf etdirilməsinin əhəmiyyətini vurğulayıblar.
