Allergik xəstəlikləri olan insanlar infeksion xəstəliklərə, o cümlədən yuxarı tənəffüs yollarının infeksiyalarına az tutulur.

Bunu koronavirus infeksiyasına yoluxan xəstələrlə işləyən allerqoloq-pulmonoloq Ramin Nəriman Aztibb.az-a açıqlamasında deyib.

O, bildirib ki, allergik insanlarda immunitet normadan çox olduğuna görə virusa daha az yoluxurlar: “Təbii ki immunitet də infeksion xəstəliklərdən qoruyur. Astma da allergik xəstəliklər qrupuna aiddir. Astma xəstələrinin immuniteti təhrif olunmuş immunitetdir, normadan artıqdır. Buna görə də o şəxslərin koronavirusa yoluxma ehtimalı azdır. Yoluxduqda da çox yüngül keçirirlər”.

“Dünya alimlərinin fikrinə görə, belə xəstələr astma olduqlarına görə COVID tutarlarsa, daha ağır keçirə və ölə biləcəklərini düşünərək qorunma qaydalarına - şəxsi gigiyena, fərdi maskalardan istifadə və s. daha ciddi riayət edirlər. İnqalyasiya preparatlarının da istifadəsinin rolu var. Onlar həm iltihab əleyhinə təsir göstərir, həm də astma əleyhinə dərmanlar bronx genişləndirici effekt verir. Ona görə də COVID-19 zamanı yaranan ilkin iltihabın qarşısını ala bilirlər”, - deyə, həkim qeyd edib.