Bu barədə Tibbi Ərazi Bölmələrini İdarəetmə Birliyinin (TƏBİB) mətbuat xidmətinin rəhbəri Rəvanə Əliyeva məlumat verib. Onun sözlərinə görə, bu dərmanı aptekdən alaraq xəstə özü sərbəst istifadə edə bilməz.

 

TƏBİB-in rəsmisi ölkədə dərman preparatlarının gətirilməsində çətinlik yaranması barədə iddiaları da cavablandırıb. R.Əliyeva bildirib ki, dünyada bu gün COVID-19-un müalicəsində effektiv hesab edilən bütün dərman vasitələri, o cümlədən "Favipiravir" Azərbaycana gətirilir. "Dərmanın qara bazarda satışı isə TƏBİB-in nəzarətində deyil. Çünki nəinki qara bazar, ümumiyyətlə apteklərdə satılan dərman vasitələri və s. qurumun səlahiyyətinə daxil deyil. TƏBİB yalnız xəstəxanaların dərman vasitələri ilə təchizatına cavabdehdir".

 

Xatırladaq ki, iqtisadçı ekspert Qubad İbadoğlu adıçəkilən virusla mübarizə üçün istifadə edilən "Favipiravir"nin ölkəmizdə olduqca az olduğunu, 30 həblik bir qutunun 50 manat olmasına baxmayaraq "qara bazar"da 5000 manata satıldığını deyib.