Plastik əməliyyatlar təkcə gözəl görünüş üçün deyil..” - Azərbaycanda bir İLKƏ imza atan estetik cərrah
05.01.2021 19:00

Bu gün ölkəmizdə ən çox icra olunan əməliyyatların sırasında estetik əməliyyatlar ön sıralarda gəlir. Estetik əməliyyat deyən kimi ağla gələn ilk şey qadının gözəl görünüşü, üz və bədən nahiyəsindəki qüsurların aradan qaldırılması proseduru olur. Lakin bu, belə deyil. Minlərlə xəstəlik və digər problemlər var ki, kişilərin, uşaqların, yaşlı insanların da xarici görünüşü ilə bağlı kompleks yaşamasına, hətta ciddi narahatlıqlara səbəb ola bilər. Bax bu zaman plastik əməliyyatlar qaçılmaz olur.

 

Modern Hospitalın plastik, rekonstruktiv və estetik cərrahı Dr. Ruslan Rəsul bu məsələlər ətrafında Aztibb.az-ın suallarını cavablandırıb.

 

- Doktor, müasir dövrümüzdə plastik cərrahiyyənin, estetik əməliyyatların önəmi nədədir?

 

- Estetik əməliyyat insanın öz görünüşündəki problemləri aradan qaldıraraq özünü daha xoşbəxt, inamlı hiss etməsinə kömək edir. Əlbəttə ki, xoşbəxtlik və özünə inam yalnız estetik gözəlliklə əlaqəli deyil, lakin çox vacib amillərdən biridir.

 

- Plastik əməliyyat etdirmək üçün müraciət edənlər daha çox xanımlardır? Və əsasən hansı yaş kateqoriyasından olan insanlardır?

 

- Plastik cərrahiyyə ilə bağlı xanımlarla yanaşı, kişilər də müraciət edir. Amma təbii ki, üstünlük xanımlardadır. Əvvəllər xanımların estetik əməliyyat üçün müraciəti kişilərlə müqayisədə hədsiz çox idi. Lakin son 3 ildə əməliyyat olunan xanımlar 55%, kişilər isə 45% təşkil edir. Yaş məsələsinə gəldikdə isə, daha çox 25-60 yaş arası qadınlar estetik əməliyyata ehtiyac duyub bizə müraciət edirlər.

 

- Maraqlıdır, kişilər daha çox hansı əməliyyatlara ehtiyac duyurlar?

 

- Kişilərin ən çox müraciət etdiyi əməliyyatlara ginekomastiya, rinoplastika, otoplastika, blefaroplastika, üzgərmə, lipoabdominoplastika və s. misal göstərmək olar.

 

- Bəs qadınlar?

 

- Qadınlar ən çox mammoplastika, abdominoplastika, rinoplastika, blefaroplastika və s. üçün müraciət edirlər.

 

- Mümkünsə, yaş məsələsinə yenidən qayıdaq. Estetik əməliyyat etdirmək üçün ən uyğun yaş hansıdır? Yaşın sağalma prosesinə və ya əməliyyatın uğurlu alınmasına təsiri necədir?

 

- Özünü gözəlləşdirmək, özgüvənini əldə etmək istəyən istənilən yaşda olan xanımlar bizə müraciət edə bilər. Məlumdur ki, pasiyent ilk növbədə müayinə olunur, sonra ona istədiyi əməliyyatın mümkün olub-olmaması ilə bağlı məlumat verilir. Yaranın sağalması üçün isə yaşın önəmi yoxdur. Əsas məsələ orqanizmin tez reaksiya verməsidir. Pasiyent var ki, 60 yaşındadır və yarası 10 günə sağalır. Pasiyent də var ki, 30 yaşında olsa da 20 gündən tez sağalma əldə edə bilmir.

 

- Aydındır, həkim. “Hər gözəlin bir eybi var” deyiblər. Xanımlarımız arasında bir deyil, bir neçə əməliyyat üçün birdən müraciət edənlər var?

 

- Bəli, bununla bağlı “kombin əməliyyat” anlayışı var, bir pasiyent üzərində bir gündə 3-4, hətta 5-6 əməliyyat həyata keçirmək olur. Əlbəttə bunun üçün pasiyent ilk növbədə bir çox müayinlərdən keçir və kombin əməliyyatın icrasının mümkünlüyü yalnız müəyyən analizlərin cavabı əldə ediləndən sonra dəqiqləşir.  Azərbaycanda ilk dəfə 10 saatlıq bir əməliyyat icra etmişəm. 54 yaşlı pasiyentdə  bir gündə 6 əməliyyat icra olunub. Gövdə, yuxarı və aşağı ətraflarla bağlı əməliyyatlarda daha çox bu kombin əməliyyatın yolu izlənilir.

 

- Bu estetik əməliyyatlar yalnız gözəlliyə və xarici görünüşə xidmət edir?

 

- Xeyr, elə estetik əməliyyatlar var ki, onun əsas məqsədi birinci növbədə xəstəni sağlamlığına qovuşdurmaq, ondan sonra isə gözəl görünüşünü təmin etməkdir. Məsələn, qadınlarda “fartuk” dedikləri qarın sallanmaları olur. Hansı ki, zamanında müdaxilə olunub götürülməzsə, gələcəkdə qadının sağlamlığı üçün müxtəlif fəsadların yaranmasına səbəb ola bilər. Yəni, plastik əməliyyatlar təkcə gözəl görünüş üçün deyil, həm də sağlamlıq üçün vacibdir.

 

- Ruslan doktor, demək ki, plastik cərraha müraciət etmək bəzən məcburiyyətə çevrilə bilər. Bəs dodaq, sinə və digər hissələrin gel və ya silikonla şişirdilməsi insan sağlamlığı üçün təhlükəlidirmi?

 

- Belə deyim, öz görünüşündən razı olmayan və bunu kompleksə çevirib bir an belə ağlından çıxarmayan qadınların psixoloji durumu daha təhlükəli ola bilər. Onu da qeyd edim ki, biz silikonlardan tez-tez süd vəzi və sağrı nahiyəsi əməliyyatlarında istifadə edirik. Süd vəzilərində yaranan assimetriya, ptoz və hipertrofik sallanma zamanı silikon mütləqdir. Bu silikonlar - yəni implantlar müxtəlif ölkələrdə istehsal edilir. Biz Amerika, Almaniya, Fransa kimi öncül ölkələrin istehsal etdiyi implantlara müraciət edirik və istifadədən öncə onların hər biri yoxlanışlardan keçir. Azərbaycanda indiyə kimi pasiyentlərə qoyulan implantlarla bağlı narazılıq olmayıb.

 

- Bayaq söhbətimiz zamanı Azərbaycanda bir ilkə imza atdığınızı bildirdiniz. Səhv etmirəmsə, süd vəziləri üzərində icra etdiyiniz yeni dikləşdirmə üsullu bir əməliyyatdan söz gedir?

 

- Bəli, 2017-ci ildə süd vəzi dikləşdirmə əməliyyatında yeni bir əməliyyat texnikası üzərində araşdırma aparmağı qərara aldım və bu texniki üsulu Türkiyədə kadavara üzərində işlədim. Bu üsulu Azərbaycanda bir çox pasiyentlər üzərində icra etdim, çox böyük uğurlarım oldu. Və bu əməliyyat texnikasını Türkiyədə icra etmək üçün Ankara Şəhər xəstəxanasına müraciət etdim. Oradan müsbət cavab gəldikdən sonra 2019-cu ildə Türkiyənin Ankara Şəhər Xəstəxanasının plastik cərrahı, professor Erol Hoca ilə birlikdə 4 pasiyent üzərində bu texnik üsulu icra etdik və çox uğurlu nəticələr əldə etdik. Gələcəkdə də bu üsulun inkişafı və əhatə dairəsinin genişlənmməsi məqsədilə bir sıra addımlar atmağı planlaşdırırıq.

 

- Bəs bu üsulun fərqi və özəlliyi nədir?

 

- Əvvəlki üsullardan fərqli olaraq, bu üsulda süd vəzi və ətraf toxumalar öz yerində qalır. Bu üsulla icra olunan əməliyyatların əsas xüsusiyyəti yara nahiyəsinin tez sağalması, ən əsası da ağrının cüzi olmasıdır. Bu texniki üsul ilə icra olunan əməliyyat hər pasiyent üzərində tətbiq oluna bilməz. Yalnız çəkisi 400-800 qr. aralığında olan süd vəzilərində tətbiq edilə bilər. Bu üsulda önəmli nüans implant istifadə etmədən süd vəzilərinin dikləşdirilməsidir.

ÇOX OXUNANLAR
Mərkəzi Klinik Xəstəxananın baş həkiminin qızının ölüm səbəbi məlum oldu  
Qazinin yüksək texnologiyalı protezlə təmin edilməsi üçün müayinəsi aparılıb
Vaksinin yaratdığı immunitetin təbii virusun yaratdığı immunitetdən güclü olmasının SƏBƏBİ
Azərbaycanda koronavirusa yoluxanların sayı ARTDI  - FOTO
Vətəndaşlar daha diqqətli olmalıdırlar ki, sıx tədbirlərin görülməsinə getməyək
ÜST: Dünyada ötən sutka koronavirusa 478 mindən çox yoluxma qeydə alınıb
Avstriyada “AstraZeneca” vaksinindən istifadə dayandırılıb
 Tanınmış həkimin ailəsində faciə - Tələbə qızı vəfat etdi (FOTO)   
İsraildən gələn həkimlər qazimizə protez göz köçürdü 
Son günlər yoluxma saylarındakı artım həkimləri yenidən “həyəcan təbili” çalmağa vadar edir
Koronavirus diş əti xəstəliyi olanlar üçün xüsusilə təhlükəlidir
Azad olunmuş ərazilərdə reabilitasiya mərkəzləri yaradıla bilər - Agentlik
İndiyədək ölkəmizdə koronavirusa qarşı vaksinasiya olunanların sayı açıqlanıb
İsveçdə
Mərkəzi Klinikada 18 aylıq körpənin qida borusundan qəpik çıxarılıb