“Koronavirusa yoluxmuş hamilə qadınlarda nadir hallarda ağırlaşmalar müşahidə olunur” - Müsahibə
02.01.2021 13:51

Yeni növ koronavirus (COVID-19) infeksiyasının ölkəmizdə yayılmağa başladığı ilk günlərdən etibarən bir çox xəstəxanalar pandemiya xəstəxanasına çevrildi, tibbi heyətin böyük bir qismi bu virusa qarşı mübarizəyə cəlb olundu. Onların səyi nəticəsində minlərlə xəstə sağalaraq normal həyatlarına geri qayıtdı. Lakin ağ xalatlı qəhrəmanlar arasında da yoluxma hallarının şahidi oluruq. Gücləndirilmiş iş rejimi, yuxusuz gecələr, pandemiya xəstəxanalarında olan çox böyük virus yükü onların sağlamlıq vəziyyətinə təsirsiz ötüşmür.

 

Aztibb.az pandemiya xəstəxanasına çevrilən Cəlilabad Rayon Mərkəzi Xəstəxanasının COVID-19-la mübarizədə iştirak edən tibb bacısı Rəxşəndə Abdullayeva ilə söhbət edib.

 

Fəaliyyət göstərdiyiniz pandemiya xəstəxanasında ağır xəstələrin sayında son zamanlar artım müşahidə olunurmu? Ən ağır xəstələr hansı yaş qrupundadır?

 

Son zamanlar xəstələrin sayı həddindən artıq çox idi. Lakin ölkə səviyyəsində koronavirusla mübarizə istiqamətində həyata keçirilən tədbirlər, dekabrın 14-dən etibarən sərt karantin rejiminin yenidən tətbiqindən sonra həm virusa yoluxma, həm də ağır xəstələrin sayı xeyli azalıb.

 

Virusu ağır keçirən insanlar arasında bütün yaş qruplarından olan şəxslərə rast gəlmək olar. Xəstələr arasında ağırlaşmalara gəldikdə, daha çox yanaşı xroniki xəstəliyi (şəkərli diabet, ürək damar, tənəffüs sistemi xəstəliklərindən əziyyət çəkən) olan, piylənmədən əziyyət çəkən insanlarda bu hallara rast gəlinir. Lakin yaşı 50-55-dən yuxarı olan insanların COVID-19-u daha ağır keçirdiyinin şahidi oluruq.

 

COVID-19-a yoluxmuş xəstələrlə yaxın təmas zamanı virusa yoluxmaqdan qorunmaq üçün həkimlər tərəfindən hansı tədbirlər görülür? Xəstəxanada neçə həkim koronavirusa yoluxub?

 

COVID-19 xəstələrinin müalicə aldığı xəstəxanalarda həkimlər qorunmağa xüsusi diqqət göstərirlər. Xəstəxanamız koronaviruslu xəstələrlə işləyən tibb işçiləri bütün zəruri tibbi vasitələr və geyimlərlə tam təmin edilib.

 

Buna baxmayaraq, bəzən bütün gigiyena qaydalarına əməl olunsa da, virusa yoluxma qaçılmaz olur. Həkimlərimiz və tibb bacıları arasında da bu xəstəliyə yoluxma halları baş verib. Təəssüflər olsun ki, onlar arasında ölümlə nəticələnənlər də var. Xəstəlikdən tam sağalanlar isə yenidən işlərinə qayıdıb bu mübarizədə öz töhfələrini verməyə davam edirlər.

 

Hamilə qadınların xəstəliyi daha asan keçirdiyi doğrudurmu? Hansı hallarda hamilələrdə ağırlaşmalar müşahidə olunur?

 

Bəli, koronavirusa yoluxan hamilə qadınlar xəstəliyi əsasən yüngül formada keçirirlər və nadir hallarda ağırlaşmalar müşahidə olunur. Xəstəxanamıza gətirilən hamilə qadınlarda da ciddi ağırlaşmalara rast gəlinməyib.

 

Virusa yoluxmamaq üçün insanlara profilaktik olaraq nə etməyi məsləhət görürsünüz?

 

Payız ayları immun sisteminin zəifləməsinə, soyuqdəymələrin artmasına, koronavirusun özünün də daha aqressiv keçməsinə səbəb oldu. Bu səbəbdən yoluxmaların sayında da artım müşahidə olundu.

 

Bundan əlavə, düzgün qidalanmama, stres, mənfi emosiyalar, az hərəkətlilik, təmiz havada az olmaq, yuxusuzluq da immun çatışmazlığına yol açan əsas amillərdir.

 

Məsləhətim odur ki, immuniteti yüksəltmək üçün ilk növbədə, gündəlik rasiona bol mövsümi tərəvəz və meyvə əlavə edin. Profilaktik olaraq heç bir antibiotik, antiviral preparat qəbul etməyin. Bu, immunitetin daha da aşağı düşməsinə gətirib çıxara bilər.

 

Düşünürəm ki, maska taxmaq, sosial məsafə gözləmək və gigiyena qaydalarına məsuliyyətlə əməl etməklə daha tez bir zamanda bu xəstəlikdən xilas ola biləcəyik.

ÇOX OXUNANLAR
Mərkəzi Klinik Xəstəxananın baş həkiminin qızının ölüm səbəbi məlum oldu  
Qazinin yüksək texnologiyalı protezlə təmin edilməsi üçün müayinəsi aparılıb
Vaksinin yaratdığı immunitetin təbii virusun yaratdığı immunitetdən güclü olmasının SƏBƏBİ
Azərbaycanda koronavirusa yoluxanların sayı ARTDI  - FOTO
Vətəndaşlar daha diqqətli olmalıdırlar ki, sıx tədbirlərin görülməsinə getməyək
ÜST: Dünyada ötən sutka koronavirusa 478 mindən çox yoluxma qeydə alınıb
 Tanınmış həkimin ailəsində faciə - Tələbə qızı vəfat etdi (FOTO)   
İsraildən gələn həkimlər qazimizə protez göz köçürdü 
Avstriyada “AstraZeneca” vaksinindən istifadə dayandırılıb
Son günlər yoluxma saylarındakı artım həkimləri yenidən “həyəcan təbili” çalmağa vadar edir
Koronavirus diş əti xəstəliyi olanlar üçün xüsusilə təhlükəlidir
Azad olunmuş ərazilərdə reabilitasiya mərkəzləri yaradıla bilər - Agentlik
İndiyədək ölkəmizdə koronavirusa qarşı vaksinasiya olunanların sayı açıqlanıb
İsveçdə
Mərkəzi Klinikada 18 aylıq körpənin qida borusundan qəpik çıxarılıb