AMEA-nın Naxçıvan Bölməsinin Təbii Ehtiyatlar İnstitutunda qurumun direktor müavini, kimya elmləri doktoru Bayram Rzayevin “Qısa Kimya Ensiklopediyası” kitabının təqdimatı keçirilib.

Tədbiri giriş sözü ilə açan AMEA Naxçıvan Bölməsinin sədri, akademik İsmayıl Hacıyev müəllifin uzunmüddətli elmi fəaliyyətinə qısa nəzər salıb. “Bayram Rzayev kimya elmi sahəsində geniş dünyagörüşünə malikdir”, - deyən alim tədqiqatçının indiyə qədər 40-dan artıq kitab və monoqrafiyasının nəşr olunduğunu bildirib.

Naxçıvan Muxtar Respublikası Ali Məclisinin Sədri yanında Bilik Fondunun dəstəyi ilə çap olunmuş kitabın nəfis tərtibatına diqqəti çəkən bölmə sədri bildirib ki, əsər nəinki kimyaçılar, həmçinin bu elmə maraq göstərən hər kəs üçün olduqca faydalı nəşrdir.

Təbii Ehtiyatlar İnstitutunun direktoru, AMEA-nın müxbir üzvü Tofiq Əliyev çıxış edərək kimya elmi ilə bağlı Azərbaycan dilində ensiklopediyanın nəşrini yüksək qiymətləndirib, kitabın gənc kimyaçıların formalaşmasında mühüm rol oynayacağını, gələcək nəsillərdə bu elmə marağı artıracağına inamını ifadə edib. 

Daha sonra çıxış edən Naxçıvan Dövlət Universitetinin dosenti, kimya üzrə fəlsəfə doktoru Akif Əliyev kitabdakı fəsillər, bəhs olunan mövzularla bağlı ətraflı məlumat verib. Bütün mətnlərin çox sadə və anlaşıqlı dillə ifadə edildiyini vurğulayan alim qeyd edib ki, kitab, həmçinin ali və orta ixtisas müəssisələrində kimya fənninin tədrisində dərslik kimi də istifadə oluna bilər.

Sonda kitabın müəllifi kimya elmləri doktoru Bayram Rzayev ona göstərilən diqqət və qayğıya görə Naxçıvan Muxtar Respublikası Ali Məclisinin Sədrinə minnətdarlığını bildirib.