Hollandiyadan olan nümayəndə heyəti Bakı Sağlamlıq Mərkəzində səfərdə olub.
Aztibb.az xəbər verir ki, nümayəndə heyətinin tərkibində Qastroenterologiya və Hepatologiya Laboratoriyasının rəhbəri Prof. Dr. Maykel Petrus Peppelensbos, beynəlxalq əlaqələr üzrə böyük məsləhətçi Dr. Raul Tan və elmi işçi, Mərkəzi Asiya üzrə layihə koordinatoru Ruslan Məmmədov yer alıblar.
Qonaqlar Bakı Sağlamlıq Mərkəzinin icraçı direktoru dos. dr. Asiman Həsənovla görüşüblər. Görüşdə qonaqlara mərkəzin fəaliyyəti, təqdim olunan tibbi xidmətlər, eləcə də müasir texnoloji infrastrukturu barədə ətraflı məlumat verilib. Tərəflər müasir tibbi texnologiyaların tətbiqi, elmi-tədqiqat və klinik sahələrdə təcrübə mübadiləsi, gələcək əməkdaşlıq perspektivləri ətrafında fikir mübadiləsi aparıblar.
Səfər çərçivəsində nümayəndə heyəti mərkəzin müxtəlif şöbələri, müasir standartlara uyğun əməliyyatxana bloku və diaqnostik imkanları ilə tanış olub. Qonaqlara tibb müəssisəsində yaradılmış şərait, yüksək texnoloji avadanlıqlar və tibbi xidmətlərin təşkili barədə məlumat təqdim edilib.
Daha sonra nümayəndə heyəti İ.M. Seçenov adına Birinci Moskva Dövlət Tibb Universitetinin Bakı filialının Simulyasiya Mərkəzini ziyarət edib. Burada qonaqlar simulyasiya əsaslı tibbi təhsil sistemi, praktik bacarıqların inkişafı üçün yaradılmış imkanlar və tətbiq olunan innovativ tədris metodları ilə tanış olublar.
Səfər zamanı keçirilən görüş və tanışlıq proqramı beynəlxalq tərəfdaşlıq əlaqələrinin genişləndirilməsi, tibb və elmi sahələrdə təcrübə mübadiləsinin təşviqi, həmçinin gələcək birgə fəaliyyət istiqamətlərinin müəyyənləşdirilməsi baxımından əhəmiyyət daşıyıb.

