Rusiya Elmlər Akademiyasının akademiki, Rusiyanın əməkdar həkimi Gennadi Onişşenkonun sözlərinə görə, uşaqlarda piylənmənin iki əsas səbəbi var. Birinci səbəb uşağın qida vasitəsilə qəbul etdiyi enerjinin orqanizmin sərf etdiyindən çox olmasıdır. Artıq enerji isə orqanizmdə piy şəklində toplanır. İkinci səbəb qidalanma rejiminin pozulmasıdır. Əksər hallarda həddindən artıq qida qəbulu günortaüstü ara yeməyi və axşam yeməyi zamanı baş verir. Gün ərzində tez-tez qəlyanaltı etmək də bu prosesə təsir göstərir.
Aztibb.az "İzvestiya" nəşrinə istinadən xəbər verir ki, akademik fastfudun qazandırdığı ən böyük problemə toxunub.
"Biz genetik olaraq formalaşmış qidalanma mədəniyyətimizi – səhər yeməyi, nahar və şam yeməyi rejimini pozmuşuq”, – deyə Onişşenkonun sözlərini nəşr sitat gətirib.
Akademik uşaqların gündəlik qidalanma vərdişləri ilə bağlı konkret nümunə də çəkib. Onun təsvir etdiyi mənzərəyə görə, uşaq küçədə gedərkən əllərini yumadan qəhvəyi kağız paketdə satılan qızardılmış kartofdan yeyir. Beləliklə, ara yeməklər normal qida qəbulunu əvəz edir, bununla yanaşı, düzgün qidalanma mədəniyyəti də tədricən arxa plana keçir.
Gennadi Onişşenko problemin həllini, ilk növbədə, düzgün qidalanma vərdişlərinin uşaqlıqdan formalaşdırılmasında görür. Onun fikrincə, həyatın ilk illərində qazanılan vərdişlər insanı ömrü boyu müşayiət edir. Buna görə də uşaqlara yalnız qadağalar qoymaq deyil, onlara sağlam qidalanma prinsiplərini izah etmək və şəxsi nümunə göstərmək vacibdir.

