2013-cü ildə Boston marafonunda baş verən terror aktından sonra aparılan araşdırmada alimlər ABŞ-da 4 675 nəfər arasında sorğu keçiriblər. Nəticələr göstərib ki, hadisədən sonrakı ilk həftə ərzində hər gün 6 saat və ya daha çox terrorla bağlı xəbərləri izləyən şəxslər hətta hadisə yerində olan insanlardan daha yüksək səviyyədə kəskin stress yaşayıblar.
Aztibb.az "Proceedings of the National Academy of Sciences (PNAS)" nəşrinə istinadən xəbər verir ki, tədqiqatçıların fikrincə, bunun səbəbi hadisə yerində yaşanan travmanın kəskin mərhələsi başa çatdıqdan sonra səngiyə bilməsi, lakin xəbərləri davamlı izləməyin stress mənbəyini insanın zehnində canlı saxlamağa davam etməsidir. Bu isə kütləvi informasiya vasitələrini travmanın mənfi təsirlərini hadisədən birbaşa zərər çəkən insanların çevrəsindən çox daha geniş auditoriyaya yayan vasitəyə çevirə bilər.
Tədqiqatçılar əsas problemin xəbərlərə həddindən artıq məruz qalmaq olduğunu vurğulayırlar. Başqa sözlə, xəbərləri izləmək özlüyündə zərərli deyil. Burada əsas fərqi xəbərlərin nə qədər müddət və hansı tezliklə izlənməsi yaradır.
Davamlı mənfi xəbərlərin psixoloji vəziyyətimizə və düşüncə tərzimizə necə təsir etdiyini anlamaq dünyada baş verən hadisələrlə daha sağlam münasibət qurmağımıza kömək edə bilər.

