Səhiyyə Nazirliyinin Elmi-Tədqiqat Kardiologiya İnstitutunda İnvaziv kardiologiya və elektrofiziologiya laboratoriyasının fəaliyyətinin birinci ildönümünə həsr olunmuş tədbir keçirilib.

 

ETKİ-dən Aztibb.az-a bildirilib ki, tədbirdə İnstitutun direktoru, professor Gülnaz Dadaşova, baş həkim, invaziv kardioloqlar və digər tibb mütəxəssisləri iştirak ediblər.

 

Çıxışlar zamanı laboratoriyanın bir il ərzində əldə etdiyi nailiyyətlər, həyata keçirilən tibbi müdaxilələr və gələcək inkişaf perspektivləri diqqətə çatdırılıb. Qeyd olunub ki, müasir tibbi texnologiyaların tətbiqi, peşəkar komanda fəaliyyəti və innovativ müalicə yanaşmaları ürək-damar xəstəliklərinin diaqnostikası və müalicəsi imkanlarının genişləndirilməsinə mühüm töhfə verir.

 

İnstitutun baş həkimi laboratoriyanın fəaliyyətinin klinik xidmətlərin təkmilləşdirilməsi və pasiyentlərə göstərilən tibbi yardımın keyfiyyətinin yüksəldilməsi baxımından əhəmiyyətini vurğulayıb.

 

İnstitutun direktoru, professor Gülnaz Dadaşova çıxışında laboratoriyanın birillik fəaliyyətini yüksək qiymətləndirərək bildirib ki, əldə olunan uğurlar kollektivin peşəkarlığının, məsuliyyətli fəaliyyətinin və birgə əməyinin nəticəsidir. O, laboratoriyanın gələcəkdə də yeni nailiyyətlər əldə edəcəyinə və ölkəmizdə kardioloji xidmətlərin inkişafına töhfə verəcəyinə əminliyini ifadə edib.

 

Tədbirin sonunda laboratoriyanın birinci ildönümü münasibətilə kollektivə təbriklər çatdırılıb, gələcək fəaliyyətlərində uğurlar arzulanıb. Daha sonra yubiley tortu kəsilib və tədbir bayram əhval-ruhiyyəsində yekunlaşıb.