Ölkə başçısının 10 sentyabr 2026-cı il tarixli Sərəncamına əsasən, yeni “Azərbaycan Respublikasında qida təhlükəsizliyinin təmin edilməsinə dair 2027–2032-ci illər üçün Dövlət Proqramı” çərçivəsində qida məhsullarında allergenlərin etiketlənməsinə nəzarətin gücləndirilməsi istiqamətində tədbirlər həyata keçiriləcək.

 

Aztibb.az xəbər verir ki, bu barədə AQTA məlumat paylaşıb.

 

Bildirilib ki, Dövlət Proqramının Tədbirlər Planının 8.4.7-ci bəndinə əsasən, 2027–2031-ci illərdə qida məhsullarının allergenlər üzrə laborator müayinələrə cəlb edilməsi və əldə olunan nəticələrin məhsulların üzərindəki etiket məlumatlarına uyğunluğunun monitorinqinin aparılması nəzərdə tutulur.

 

Bununla yanaşı, monitorinqlərin nəticələrinin təhlil edilərək müvafiq təkliflərin hazırlanması, həmçinin qida məhsullarında allergenlərlə bağlı əhalinin məlumatlılığının artırılması məqsədilə maarifləndirmə tədbirlərinin həyata keçirilməsi planlaşdırılır.

 

Beləliklə, yeni Dövlət Proqramında allergenlərin etiketlənməsinə nəzarətin gücləndirilməsi ilə yanaşı, istehlakçıların bu barədə məlumatlılığının artırılması da prioritet istiqamətlərdən biri kimi müəyyənləşdirilib.