Mərkəzi Gömrük Hospitalının müasir tibbi avadanlıqlarla təchiz edilmiş Fizioterapiya şöbəsində müxtəlif xəstəliklərin müalicəsi və reabilitasiyası məqsədilə qabaqcıl fizioterapevtik metodlardan istifadə olunur. Təcrübəli və yüksəkixtisaslı tibb mütəxəssisləri tərəfindən pasiyentlərin sağlamlıq vəziyyətinə uyğun fərdi müalicə proqramları hazırlanır.

 

Hospitaldan Aztibb.az-a bildirilib ki,, şöbədə sinir sistemi xəstəlikləri, Parkinson xəstəliyi, üz sinirinin iflici, beyin və onurğa beyni zədələnmələri, insultdan sonrakı hərəkət pozğunluqları, bel, boyun və çiyin nahiyəsində ağrılar, fəqərəarası disk yırtıqları, skolioz, uşaqlarda lordoz, əzələ-sümük sistemi xəstəlikləri, eləcə də nevroloji və yaşla əlaqəli ortopedik problemlər zamanı fizioterapiya və reabilitasiya xidmətləri göstərilir.

 

Müasir fizioterapevtik prosedurlar

 

Dünyanın bir sıra aparıcı ölkələrində tibbi təhsil almış şöbənin mütəxəssisləri pasiyentlərə ultrasəs terapiyası, kombinə edilmiş elektroterapiya, elektroforez, Endopress, elektrostimulyasiya, qısa dalğa terapiyası, lazer terapiyası, traksiya (mexaniki dartma), maqnitoterapiya, tibbi masaj, limfodrenaj və zərbə dalğa terapiyası kimi prosedurlar tətbiq edirlər.

Fizioterapiya şöbəsində elektroterapiya, ultrasəs və lazer terapiyası da həyata keçirilir. Bu texnologiyalar həkimin təyin etdiyi müalicə proqramı çərçivəsində pasiyentlərin reabilitasiya prosesinə dəstək verir.

 

Mərkəzi Gömrük Hospitalının Fizioterapiya şöbəsinin rəisi, fizioterapevt Səidə Kərimova və fizioterapevt Afət Çəndirli pasiyentlərin müayinəsinin nəticələrinə, xəstəliyin növünə və ağırlıq dərəcəsinə əsasən müvafiq müalicə prosedurlarını təyin edirlər. Şöbənin əsas prinsiplərindən biri hər bir pasiyentə fərdi yanaşmaq və onun funksional imkanlarının bərpasına kömək etməkdir.

Skoliozun müalicəsində Schroth metodu

 

Onurğa sütununun üçölçülü deformasiyası ilə xarakterizə olunan skolioz dayaq-hərəkət sisteminin geniş yayılmış problemlərindən biridir. Bu vəziyyət uşaqlıq və yeniyetməlik dövründə yarana, eləcə də müxtəlif yaşlarda müşahidə oluna bilər. Skoliozun müalicəsi zamanı xəstəliyin dərəcəsi, pasiyentin yaşı və ümumi sağlamlıq vəziyyəti nəzərə alınır.

Mərkəzi Gömrük Hospitalının Fizioterapiya şöbəsində uyğun pasiyentlər üçün konservativ müalicə və reabilitasiya yanaşmalarından, o cümlədən alman mütəxəssisi Katarina Schroth tərəfindən işlənib hazırlanmış Schroth metodundan istifadə olunur.

 

Schroth metodu onurğanın vəziyyətinə uyğunlaşdırılmış üçölçülü (3D) korreksiyaedici hərəkətləri və xüsusi tənəffüs texnikalarını əhatə edir. Bu yanaşmanın məqsədi bədən duruşunun korreksiyasına, əzələ balansının yaxşılaşdırılmasına və pasiyentin funksional imkanlarının artırılmasına dəstək olmaqdır. Müalicə üsulu həkim müayinəsindən sonra, skoliozun xüsusiyyətlərinə uyğun seçilir.

 

Fərdi yanaşma və kompleks reabilitasiya

Fizioterapevtik müalicədən əvvəl pasiyentin vəziyyəti ətraflı qiymətləndirilir, zəruri müayinələr aparılır və müvafiq diaqnoz əsasında müalicə planı hazırlanır. Seçilən prosedurlar xəstəliyin xüsusiyyətlərinə və pasiyentin ehtiyaclarına uyğun şəkildə kompleks tətbiq edilir.

 

Fizioterapiya və reabilitasiya ağrının azaldılmasına, hərəkətliliyin yaxşılaşdırılmasına, əzələ gücünün və funksional imkanların bərpasına, həmçinin insult və digər nevroloji zədələnmələrdən sonra reabilitasiya prosesinə kömək edə bilər. Müalicənin nəticəsi xəstəliyin növündən, ağırlıq dərəcəsindən və pasiyentin fərdi xüsusiyyətlərindən asılıdır. Cərrahi müdaxilənin zəruri olduğu hallarda müalicə taktikası həkim tərəfindən müəyyən edilir.

 

Mərkəzi Gömrük Hospitalının Fizioterapiya şöbəsində müalicə və reabilitasiya tədbirləri klinik protokollara uyğun, müasir fizioterapiya metodları və fərdi yanaşma əsasında həyata keçirilir. Şöbənin məqsədi pasiyentlərin fiziki potensialının inkişafına, hərəkət imkanlarının yaxşılaşdırılmasına və gündəlik həyata daha fəal qayıtmalarına dəstək olmaqdır.