Müasir onkologiya son onilliklər ərzində xərçəngin diaqnostikası və müalicəsində yeni üsulların tətbiqi sayəsində ciddi irəliləyiş əldə edib.

Aztibb.az "İzvestiya" nəşrinə istinadən yazır ki, bu barədə Rusiya Səhiyyə Nazirliyinin baş onkoloqu Andrey Kaprin məlumat verib.

«Onkologiyanın son onilliklər ərzində necə dəyişdiyinə nəzər salsaq, irəliləyişin olduqca böyük olduğunu görərik. Bu gün elə xəstəliklər var ki, əksər hallarda onları uğurla müalicə edə bilirik. Xüsusilə də xəstəlik erkən mərhələdə aşkarlandıqda», – deyə o, TASS-a müsahibəsində bildirib.

Mütəxəssisin sözlərinə görə, hədəfli terapiya və immunoterapiya, müasir şüa müalicəsi üsulları, hüceyrə texnologiyaları, eləcə də molekulyar-genetik diaqnostikanın inkişafı həkimlərin imkanlarını əhəmiyyətli dərəcədə genişləndirib. Bunun sayəsində bəzi hallarda hətta şiş prosesi geniş yayıldıqda belə xəstəliyi uzun illər nəzarətdə saxlamaq mümkün olur.

Bununla yanaşı, bəzi onkoloji xəstəliklərin müalicəsi hələ də olduqca mürəkkəb olaraq qalır. Andrey Kaprin buna qlioblastoma və mədəaltı vəzi xərçəngini nümunə göstərərək, bu istiqamətlərdə mütəxəssislərin qarşısında hələ böyük işlərin dayandığını bildirib.

Onkoloq həmçinin xərçəngə qarşı tam qələbənin nə vaxt əldə ediləcəyinə dair konkret müddət söyləməyin mümkün olmadığını vurğulayıb. Onun sözlərinə görə, söhbət bir-birindən fərqlənən və müalicəyə müxtəlif cür reaksiya verən çoxsaylı şiş növlərindən gedir.

Kaprin onkologiyanın gələcək inkişafının əsas istiqamətlərindən biri kimi müalicənin fərdiləşdirilməsini göstərib. Hazırda terapiya seçilərkən həkimlər yalnız şişin yerləşdiyi nahiyəni deyil, onun bioloji və genetik xüsusiyyətlərini, eləcə də müalicəyə davamlılığın yaranma mexanizmlərini də nəzərə alırlar.