Son dövrlərdə süni intellektlə bağlı risklər, o cümlədən milli səhiyyə sistemlərinə yönələn kiberhücumlar daha çox müzakirə olunur.

Aztibb.az xəbər verir ki, bunu Azərbaycanın rəqəmsal inkişaf və nəqliyyat nazirinin müavini Rəşad Həsənov II Azərbaycan Beynəlxalq İnvestisiya Forumu çərçivəsində keçirilən “Ağıllı iqtisadiyyatlar: Süni intellekt, innovasiya və rəqəmsal transformasiya” adlı panel sessiyada deyib.

Onun sözlərinə görə, süni intellektin geniş miqyasda tətbiqi üçün onun məsuliyyətli və təhlükəsiz şəkildə inkişaf etdirilə biləcəyi mühitin formalaşdırılması vacibdir. Bu proses koordinasiyalı yanaşma, infrastruktur, insan kapitalı, kibertəhlükəsizlik, tənzimləmə və investisiyaları əhatə edir.

Rəşad Həsənov bildirib ki, Azərbaycan artıq süni intellektlə bağlı müzakirələrdən onun real tətbiqinə keçir. Nazir müavini dövlət qurumlarında fəaliyyət göstərən süni intellekt əsaslı tətbiqlər sırasında süni intellekt əsaslı kibertəhlükəsizlik mərkəzini də qeyd edib.

O, həmçinin Azərbaycanda təhsil sistemində tələbə köməkçisi, kənd təsərrüfatında bitki xəstəliklərinin proqnozlaşdırılması və vətəndaşların suallarını cavablandıran MyGov AI sisteminin tətbiq olunduğunu bildirib.

Rəşad Həsənovun sözlərinə görə, süni intellektin inkişafı ilə yanaşı, yüksək hesablama gücünə malik infrastrukturun yaradılması da vacibdir. O qeyd edib ki, hesablama infrastrukturu etibarlı enerji, bağlantı və fiziki məkan tələb edir.