Sentyabrın 1-dən Rusiyada toxuma və orqanların üçölçülü bioprintinqinə həsr olunmuş ilk milli standart qüvvəyə minəcək. QOST R 72595–2026 “Toxuma və orqan ekvivalentlərinin üçölçülü bioprintinqi. Əsas prinsiplər. Terminlər və təriflər” adlı sənəd texnologiya üzrə vahid terminologiyanı və əsas prinsipləri müəyyən edir.

Aztibb.az "Life" portalına istinadən yazır ki, üçölçülü bioprintinq bioloji materiallardan toxuma və orqan ekvivalentlərinin yaradılmasına imkan verən texnologiyadır. Standarta əsasən, bu məqsədlə heyvan, bitki, dəniz mənşəli, mikrobioloji və insan mənşəli bioloji materiallardan istifadə edilə bilər. Texnologiyanın əsas məqsədlərindən biri orqanizmin itirilmiş funksiyalarının bərpasına xidmət edən bioloji strukturların yaradılmasıdır.

Standart bioprintinqin müxtəlif üsullarını, o cümlədən mürəkkəb püskürtmə, lazer, robotlaşdırılmış çap və hüceyrə sferoidlərindən istifadə etməklə bioprintinq metodlarını əhatə edir.

Bioprintinqdə istifadə olunan bio-mürəkkəblərin tərkibinə təbii polisaxaridlər, zülallar, hüceyrə suspenziyaları və pasiyentin öz hüceyrələrindən — autoloji hüceyrələrdən istifadə edilə bilər. Standart həmçinin bio-mürəkkəblərin üçölçülü strukturların formalaşdırılması üçün zəruri reoloji və bioloji xüsusiyyətlərə malik olmasını nəzərdə tutur.

Mütəxəssislərin fikrincə, milli standartın qəbul edilməsi bioprintinq sahəsində tədqiqatların vahid terminologiya və tələblər əsasında aparılmasına, texnologiyanın sənaye miqyasında tətbiqinə və gələcəkdə biotibbi məhsulların seriyalı istehsalına keçid üçün şərait yaradılmasına imkan verə bilər.