Son döyüşünə yollanan, amma ailəsi üçün dağlardan şəfa toplamağı da unutmayan general - Polad Həşimovun unudulmaz əmanəti
22.11.2026 13:01

Azərbaycanın Milli Qəhrəmanı, general-mayor Polad Həşimovun son döyüşündən əvvəl öz əlləri ilə topladığı şəfalı bitkilər Azərbaycan Tibb Universitetində (ATU) elmi tədqiqata cəlb olunub. Generalın ailəsinə sevgisinin, doğma torpağa bağlılığının və təbiətə bələdliyinin izlərini daşıyan bu bitkilərin araşdırılması isə olduqca təsirli tarixçəyə malikdir.

 

Generalın əllərindən ATU laboratoriyasına qədər yol alan bitkilər

 

1975-ci ildə Qəbələ rayonunun Vəndam kəndində dünyaya göz açan Polad Həşimov uşaqlıqdan təbiətə, dağlara, bitkilərə yaxından bələd olub. Doğma torpağın hər qarışını sevən generalın bu bağlılığı ailəsi üçün etdiyi kiçik, lakin mənalı bir hərəkətdə də özünü göstərib.

 

Həyat yoldaşı Ofeliya xanımın sözlərinə görə, Polad Həşimov sonuncu döyüşünə yollanmazdan əvvəl ailəsinin sağlamlığı üçün xidmət etdiyi yüksəkliklərdən müxtəlif müalicəvi bitkilər toplayıb.

 

O zaman bəlkə də heç kimin ağlına gəlməzdi ki, həmin bitkilər illər sonra elmi araşdırmanın mövzusuna çevriləcək, generalın təbiətdən topladığı bu kiçik əmanət universitet laboratoriyalarında tədqiq olunacaq.

 

Ofeliya xanım həmin bitkilərin növləri və müalicəvi xüsusiyyətləri barədə elmi məlumat əldə etmək istəyirdi. Bu missiyanı məhz Azərbaycan Tibb Universiteti öz üzərinə götürdü.

Beləliklə, Polad Həşimovun öz əlləri ilə topladığı bitkilərin elmi kimliyinin müəyyənləşdirilməsi istiqamətində araşdırmalara start verildi.

 

Generalın topladığı bitkilər alimlərin diqqətində

Tədqiqatın sistematik şəkildə aparılması üçün şəhid generalın qızı, ATU-nun I Müalicə-profilaktika fakültəsinin VI kurs tələbəsi Aybəniz Həşimovaya müraciət olundu.

 

Universitetin Tələbə Elmi Cəmiyyətinin fəaliyyəti çərçivəsində Farmakoqnoziya ilə Əczaçılıq texnologiyası və idarəçiliyi kafedraları birgə tədqiqata başladılar.

 

Farmakoqnoziya kafedrasının müdiri, professor Cavanşir İsayev və Əczaçılıq texnologiyası və idarəçiliyi kafedrasının dosenti Aidə Bəndəliyevanın rəhbərliyi ilə Əczaçılıq fakültəsinin II kurs tələbəsi Günay Mahmudi və Aybəniz Həşimova bitki nümunələrinin identifikasiyasını həyata keçirdilər.

 

Araşdırma nəticəsində generalın topladığı bitkilərin növləri, farmakoloji xüsusiyyətləri və ənənəvi təbabətdə istifadə istiqamətləri müəyyənləşdirildi:

- Cökə (Tilia) və adaçayı (Salvia) – ənənəvi olaraq tənəffüs yolları ilə bağlı şikayətlərdə istifadə olunan, iltihabəleyhinə və antiseptik xüsusiyyətləri ilə tanınan bitkilərdir.

- İtburnu (Rosa canina) – C vitamini və digər bioloji aktiv maddələrlə zənginliyi ilə seçilir.

- Andız (Inula helenium) – ənənəvi təbabətdə bəlğəmgətirici vasitə kimi tanınır.

- Qaraqınıq (Origanum) və razyana (Foeniculum) – həzm sisteminə təsirləri və ənənəvi istifadəsi ilə diqqət çəkir.

- Güllücə (Centaurea) və qatırquyruğu (Equisetum) – xalq təbabətində müxtəlif məqsədlərlə, o cümlədən sidik-ifrazat sistemi ilə bağlı istifadəsi ilə tanınır.

 

Generalın seçdiyi bitkilərin müxtəlif ənənəvi istifadə sahələrinə malik olması tədqiqatın maraqlı məqamlarından biridir. Bununla belə, onların konkret müalicəvi effektivliyinin təsdiqi üçün əlavə farmakoloji və klinik araşdırmalar da tələb olunur.

 

Sirri öyrənilən bitkilər yalnız şəfa mənbəyi deyil, həm də qəhrəmanlıq dastanının səssiz şahididir

 

Tədqiqat zamanı ATU nümayəndələri Polad Həşimovun məzarını ziyarət etməyi da unutmayıblar.

 

Gənc tədqiqatçı Günay Mahmudi bu ziyarətin onda yaratdığı duyğuları belə ifadə edib: “Biz şəhid generalımızın məzarını ziyarət edərkən mən bir daha anladım ki, Polad Həşimovun timsalında qəhrəmanlıq və şəfa anlayışları eyni kökdən – Azərbaycan torpağından qidalanır. Bu gün biz əczaçıların bütün sirrini öyrəndiyimiz dərman bitkiləri yalnız bir şəfa mənbəyi deyil, həm də artıq bir qəhrəmanlıq dastanının səssiz şahididir”.

 

Polad Həşimovun adı Azərbaycan tarixində qəhrəmanlığı ilə yaşayır. Onun öz əlləri ilə topladığı bu bitkilər isə qəhrəmanın həyatından qalan başqa bir izə çevrilib – ailəsinə sevgisinin, torpağa bağlılığının və təbiətə hörmətinin səssiz yadigarına.

Bir generalın döyüş meydanında yazdığı qəhrəmanlıq dastanının başqa bir səhifəsi bu dəfə elmin dili ilə danışır.

ÇOX OXUNANLAR
1-ci tip diabetin inkişafını gecikdirən dərman ilk dəfə xəstəyə tətbiq edilib
Ürəyin işemik xəstəliyi diaqnozu ilə müraciət edən pasiyent üzərində AKŞ əməliyyatı uğurla icra olunub - Tədris Cərrahiyyə Klinikası
Rəşad Şolanın yeni cərrahi metodu beynəlxalq konqresdə qalib seçilib
Rəşad Şolanın ixtirası dünyada birinci oldu
Şirvan ŞMX-da ağır əl travması alan pasiyent üzərində uğurlu əməliyyat icra olunub
 Mərkəzi Gömrük Hospitalının şöbə rəisi “Certificate of Merit” Fəxri Xidmət Sertifikatı ilə təltif olunub   
Araşdırma: Yüksək dozada Omeqa-3 qəbulu belə yaddaş zəifləməsinin qarşısını almayıb  
TƏBİB: Ötən ay təcili tibbi yardım xidməti tərəfindən 131 305 nəfərə tibbi yardım göstərilib
45 dəqiqəlik mübarizə, bir ömrə verilən ikinci şans – Həkimlər pasiyenti həyata qaytardılar
Ağdərə rayonunun Suqovuşan qəsəbəsində tibbi aksiya: 10 nəfərə zəruri xidmətlər göstərilib
Uşaqlıq qanaxması şikayəti ilə müraciət edən xəstəyə cərrahi müdaxilə həyata keçirilib - Tədris Cərrahiyyə Klinikası
Dəri altında yaranan şişlik dermoid kista ola bilər
Huawei diabetə nəzarət üçün yeni davamlı qlükoza monitorinq sistemini təqdim edib
Alimlər Altsheymer xəstəliyinin qarşısını ala bilən burun damcısı hazırlayıblar  
8 yaşlı pasiyent üzərində mürəkkəb rekonstruktiv əməliyyat icra olunub