Türkiyə Səhiyyə Nazirliyi, TÜSEB və ASELSAN-ın əməkdaşlığı ilə hazırlanmış yerli ürək-ağciyər aparatı “LIFELINE HLM” Qaziantep Universitetinin Şahinbəy Araşdırma və Tətbiq Xəstəxanasında həyata keçirilən dörd açıq ürək əməliyyatında uğurla istifadə edilib.

Aztibb.az "TRT Haber"ə istinadən yazır ki, ASELSAN tərəfindən hazırlanmış və ilk klinik tətbiqi Ankara Bilkənd Şəhər Xəstəxanasında həyata keçirilən cihazın ikinci klinik tətbiq mərkəzi GAÜN Şahinbəy Araşdırma və Tətbiq Xəstəxanası olub.

Klinik tədqiqat çərçivəsində həyata keçirilən əməliyyatlardan birində xəstəyə üç damar bypass əməliyyatı, digər bir əməliyyatda isə minimal invaziv üsulla ürək qapağının dəyişdirilməsi həyata keçirilib.

Açıq ürək əməliyyatları zamanı ürək və ağciyərlərin funksiyasını müvəqqəti olaraq öz üzərinə götürən cihazın əməliyyatlarda uğurla istifadə edildiyi bildirilib.

GAÜN rektoru Prof. Dr. Sait Mesut Doğan xəstələri ziyarət edərək onların səhhətləri barədə GAÜN Tibb Fakültəsinin Ürək və Damar Cərrahiyyəsi şöbəsinin rəhbəri Dos. Dr. Mehmet Karahandan məlumat alıb.

Doğan yerli və milli səhiyyə texnologiyalarının inkişafı baxımından cihazın klinik tətbiqlərindən birinin Qaziantep Universitetində həyata keçirilməsinin əhəmiyyətli olduğunu bildirib.

TÜSEB sədri Prof. Dr. Ümit Kervan isə ürək-ağciyər aparatının təxminən üç illik iş nəticəsində səhiyyə işçiləri və mühəndislərin töhfələri ilə hazırlandığını qeyd edib.

GAÜN Tibb Fakültəsinin Ürək və Damar Cərrahiyyəsi şöbəsinin rəhbəri Dos. Dr. Mehmet Karahan bildirib ki, Qaziantep Universiteti klinik tədqiqatda əsas araşdırma mərkəzi kimi cihazın təhlükəsizliyinin, performansının və klinik nəticələrinin qiymətləndirilməsinə töhfə verib.