Aparılan yeni tədqiqat 100 yaşını keçmiş şəxslərin xərçəng və digər ağır xəstəliklərdən qorunmasında rol oynaya biləcək bioloji mexanizmi üzə çıxarıb.

Aztibb.az "Cell Press" nəşrinə istinadən yazır ki, elmi işə görə, bu şəxslərin immun sistemində nadir rast gəlinən T hüceyrə növünün zaman keçdikcə artdığı və adaptasiya olunduğu müəyyənləşib.

Osaka Universitetinin immunoloqu Kosuke Haşimotonun rəhbərlik etdiyi tədqiqatçılar qrupu immun sistemində normalda yardımçı rol oynayan CD4 T hüceyrələrinin yaş artdıqca öldürücü T hüceyrələrinə (CD4 CTL) çevrildiyini təsbit edib.

Çoxalma qabiliyyətini və aktivliyini qoruyan bu hüceyrələr orqanizmdə infeksiyaya uğramış və ya xərçəngləşmiş hüceyrələri aşkarlayaraq məhv etmək funksiyasını yerinə yetirir.

Yaponiyada aparılan araşdırmada 28 iştirakçının qan nümunələri təhlil edilib. 70, 80 və 90 yaşlarındakı şəxslərdə bu öldürücü hüceyrələrin nisbəti orta hesabla 4% səviyyəsində qaldığı halda, 100 yaşlı fərdlərdə bu göstərici 9,6%-ə, 110 yaşını aşmış insanlarda isə 17,6%-ə qədər yüksəlib.

Əldə olunan nəticələr göstərir ki, bu hüceyrələr yaşlanma nəticəsində immun sisteminin zəifləməsindən deyil, əksinə orqanizmin yaranan təhdidlərə qarşı inkişaf etdirdiyi adaptasiya mexanizminin tərkib hissəsi kimi meydana çıxır.

Tədqiqat 100 yaşdan yuxarı fərdlərdə sözügedən hüceyrələrin təxminən üçdə birinin tək bir ilkin hüceyrənin klonları olduğunu göstərib. Mütəxəssislər hesab edirlər ki, yaş artdıqca çoxalan anomal və xərçəng hüceyrəsi riskinə qarşı immun sistemi məhz bu xüsusi hüceyrələri artıraraq güclü müdafiə baryeri formalaşdırır.

Alimlər əldə olunan elmi tapıntıların uzunömürlülüyün sirlərini və yaşlanma ilə bağlı hüceyrə səviyyəsində baş verən dəyişiklikləri anlamaq istiqamətində mühüm addım olduğunu bildirirlər.