İlon Mask bildirib ki, Tesla-nın humanoid robotu Optimus yaxın gələcəkdə cərrahi əməliyyatları insan həkimləri ilə müqayisə edilə biləcək, hətta bəzi hallarda onları üstələyəcək dəqiqliklə yerinə yetirə bilər.

Aztibb.az "Futuremedicine" portalına istinadən yazır ki, Mask bu barədə son çıxışlarından birində danışaraq Optimusu hazırlanmaqda olan "möhtəşəm cərrah" kimi xarakterizə edib. O vurğulayıb ki, robot qabaqcıl robot texnologiyaları, süni intellektə əsaslanan görmə sistemləri və yüksək dəqiqlikli hərəkət idarəetməsi sayəsində yorulmadan və əl titrəməsi olmadan incə tibbi əməliyyatlar həyata keçirə biləcək.

Onun sözlərinə görə, Optimus gücləndirici öyrənmə (reinforcement learning) metodları və Tesla zavodlarında toplanan real iş məlumatları əsasında təlim keçir. Bu yanaşma robotun istehsalat prosesində qazandığı incə motor bacarıqlarını gələcəkdə cərrahi əməliyyatlara tətbiq etməsinə imkan verəcək.