Alimləri zədələnmiş sümüklərin bərpası üçün nəzərdə tutulan qranullar hazırlayıb və bu materiala patent alıblar. Hidroksiapatit əsasında yaradılan materialın tərkibinə stronsium və gümüş ionları əlavə edilib. Bu kombinasiya materiala sümük toxumasına inteqrasiya olunmaqla yanaşı, antibakterial təsir göstərmək imkanı verir.

Aztibb.az "İzvestiya" nəşrinə istinadən yazır ki, hazırlanan qranullar ağır sınıqlar, müxtəlif xəstəliklər və cərrahi əməliyyatlardan sonra yarana bilən böyük sümük defektlərinin doldurulması üçün nəzərdə tutulub.

Alimlərin məlumatına görə, qranulların tərkibi və hazırlanma texnologiyası onların məsaməliliyini, mexaniki möhkəmliyini və orqanizmdə tədricən həllolma sürətini tənzimləməyə imkan verir. Laboratoriya şəraitində bu proses ən azı üç həftə davam edir.

Materialın əsasını sümük toxumasının mineral hissəsinə tərkib baxımından yaxın olan hidroksiapatit təşkil edir. Onun strukturuna əlavə edilən stronsium və gümüş ionları isə materialın funksional xüsusiyyətlərini genişləndirir.

NİTU MİSİS-in Ümumi və Qeyri-üzvi Kimya kafedrasının dosenti Yekaterina Çikanovanın sözlərinə görə, gümüş antibakterial xüsusiyyətləri ilə tanınır. Lakin onun miqdarının həddindən artıq olması yalnız bakteriyalara deyil, orqanizmin hüceyrələrinə də mənfi təsir göstərə bilər.

“Buna görə material hazırlanarkən sağlam toxumalara zərər vermədən lazımi antibakterial effekti təmin edəcək gümüş miqdarının seçilməsi vacibdir”, – alim qeyd edib.