Ağız sağlamlığı təkcə dişlərin vəziyyəti ilə məhdudlaşmır, eyni zamanda beyin sağlamlığına da təsir göstərə bilər. Elmi araşdırmalar ağız boşluğunda yaranan xroniki iltihabların Alzheimer xəstəliyi və demens riskinin artması ilə əlaqəli ola biləcəyini göstərir.

Aztibb.az "Medicalmedia" portalına istinadən yazır ki, mütəxəssislərin sözlərinə görə, müalicə olunmayan diş çürümələri və diş əti xəstəlikləri ağız boşluğunda uzunmüddətli iltihaba səbəb olur. Bu iltihabi proseslər zamanla bütün orqanizmə təsir edərək müxtəlif xroniki xəstəliklərin, o cümlədən ürək-damar xəstəlikləri, şəkərli diabet və neyrodegenerativ pozuntuların inkişafı üçün əlverişli şərait yarada bilər.

Bildirlir ki, ağız sağlamlığı ürəkdən beyinə qədər bütün orqanizmin fəaliyyətinə təsir göstərən mühüm amildir. Onun sözlərinə görə, ağız boşluğunda davam edən xroniki iltihablar beyində müəyyən bioloji mexanizmləri aktivləşdirə bilər.

Alimlər vurğulayırlar ki, mövcud tədqiqatlar diş çürüməsinin Alzheimer xəstəliyinə birbaşa səbəb olduğunu sübut etmir. Lakin elmi dəlillər ağız boşluğundakı xroniki iltihabların bu xəstəliklə əlaqəli ola biləcəyini və demens riskinin artmasına töhfə verə biləcəyini göstərir. Buna görə də ağız gigiyenasına riayət etmək və diş problemlərini vaxtında müalicə etdirmək yalnız dişlərin deyil, ümumi sağlamlığın qorunması baxımından da mühüm əhəmiyyət daşıyır.