Avstraliyalı alimlərin apardığı tədqiqat arı zəhərinin tərkibində olan melittin adlı peptidin döş xərçənginin ən aqressiv formalarına qarşı perspektivli təsir göstərə biləcəyini ortaya qoyub.

Aztibb.az "Nature Precision Oncology" jurnalında dərc olunan məqaləyə istinadən yazır ki, melittin laboratoriya şəraitində xüsusilə üçqat mənfi döş xərçəngi hüceyrələrinin membranını zədələyərək onların məhvinə səbəb olub. Alimlər müəyyən ediblər ki, bu maddə həmçinin şiş hüceyrələrinin böyüməsini təmin edən HER2 siqnal yollarının fəaliyyətini də zəiflədə bilir.

Araşdırmada qeyd edilir ki, melittin sağlam hüceyrələrə minimal təsir göstərməklə əsasən xərçəng hüceyrələrini hədəfə alıb. Üçqat mənfi döş xərçəngi xəstəliyin ən aqressiv formalarından biri hesab olunur və bu növ üçün hədəflənmiş müalicə imkanları hələ də məhduddur.

Tədqiqat zamanı melittin kimyaterapiyada istifadə olunan dosetaksel preparatı ilə birlikdə tətbiq edildikdə, siçan modellərində şişlərin ölçüsünü hər iki preparatın ayrı-ayrılıqda istifadəsi ilə müqayisədə daha effektiv şəkildə azaltdığı müşahidə olunub.

Bununla belə, mütəxəssislər vurğulayırlar ki, bu nəticələr yalnız laboratoriya və heyvan modellərində əldə edilib. Melittinin insanlar üçün təhlükəsiz və effektiv müalicə vasitəsi kimi tətbiq oluna bilməsi üçün genişmiqyaslı klinik tədqiqatların aparılması zəruridir. Buna baxmayaraq, əldə olunan nəticələr gələcəkdə döş xərçənginin müalicəsində yeni yanaşmaların inkişafı üçün ümidverici hesab olunur.