İzmirli alimlər süni intellekt dəstəyi və simsiz enerji ötürülməsi texnologiyası ilə işləyən yerli süni ürək dəstək sistemi hazırlayıblar.

Aztibb.az "Haber Türk"ə istinadən yazır ki, layihənin əsas məqsədi infeksiya riskini azaltmaq və xəstələri xarici batareya çantası daşımaq məcburiyyətindən azad etməkdir.

Hazırlanan sistem xüsusilə son mərhələ ürək çatışmazlığından əziyyət çəkən və ürək transplantasiyası gözləyən xəstələr üçün nəzərdə tutulub. Texnologiyada süni intellekt və "rəqəmsal əkiz" modeli tətbiq edilərək xəstənin vəziyyətinin real vaxt rejimində izlənməsi və həkimlərə operativ məlumat ötürülməsi planlaşdırılır. Simsiz enerji ötürülməsi sayəsində cihazın işləməsi üçün bədəndən kənara çıxan kabellərə ehtiyac qalmayacaq ki, bu da infeksiya riskini əhəmiyyətli dərəcədə azalda bilər.

Layihə çərçivəsində qan hüceyrələrinin zədələnməsinin qarşısını almaq məqsədilə maqnit levitasiya texnologiyasından da istifadə nəzərdə tutulur. Tədqiqatçılar bildirirlər ki, yerli istehsal hesabına cihazın qiymətini aşağı salmaq və daha çox xəstənin bu müasir müalicə imkanından yararlanmasını təmin etmək hədəflənir. Hazırda prototip üzərində işlər davam edir, növbəti mərhələdə isə laboratoriya sınaqlarının aparılması planlaşdırılır.