2025/2026-cı tədris ili üzrə beynəlxalq əməkdaşlıq çərçivəsində Naxçıvan Dövlət Universitetinin “Əczaçılıq” ixtisası üzrə təhsil alan tələbələri Türkiyənin nüfuzlu ali təhsil müəssisələrindən biri olan Qazi Universitetinin Əczaçılıq Fakültəsində təşkil edilən yay staj proqramını uğurla davam etdirirlər.

Aztibb.az xəbər verir ki, staj proqramı çərçivəsində tələbələr Analitik Kimya, Biokimya, Klinik Əczaçılıq, Əczaçılıq İdarəçiliyi, Farmasevtik Kimya, Farmasevtik Toksikologiya, Farmakologiya, Farmakoqnoziya, Farmasevtik Texnologiya və Farmasevtik Mikrobiologiya anabilim bölmələrində, eləcə də Təcrübə Heyvanlarına Baxım və Eksperimental Araşdırmalar Mərkəzində təşkil olunan praktik məşğələlərdə iştirak edirlər.

Rotasiya prinsipi əsasında həyata keçirilən təcrübə müddətində tələbələr müasir laboratoriyaların iş prinsipi, analitik və biokimyəvi tədqiqat metodları, dərman preparatlarının hazırlanması və keyfiyyətinə nəzarət prosesləri, klinik əczaçılıq xidmətləri, farmakoloji və toksikoloji qiymətləndirmə üsulları, həmçinin əczaçılıq sahəsində tətbiq olunan innovativ yanaşmalarla yaxından tanış olur, praktiki bacarıqlarını inkişaf etdirirlər.

Beynəlxalq staj proqramı tələbələrin nəzəri biliklərini praktik təcrübə ilə möhkəmləndirməsinə, müasir əczaçılıq sahəsinin iş prinsiplərini dərindən mənimsəməsinə və peşəkar kompetensiyalarını artırmasına mühüm töhfə verir.