İngiltərənin Dərman və Səhiyyə Məhsullarının Tənzimlənməsi Agentliyi (MHRA) ağır ağciyər xəstəliklərinin müalicəsi üçün nerandomilast (ticarət adı Jascayd) preparatını rəsmi olaraq təsdiqləyib. Yeni dərmanın ağciyər toxumasının tədricən sərtləşməsi ilə xarakterizə olunan xəstəliklərdən əziyyət çəkən pasiyentlərin müalicəsində istifadə olunacağı bildirilir.

Aztibb.az "Biomedia" nəşrinə istinadən yazır ki, yeni preparat əsasən İdiopatik Pulmonar Fibroz (IPF) və Proqressiv Pulmonar Fibroz (PPF) diaqnozu qoyulmuş yetkin xəstələrin müalicəsi üçün nəzərdə tutulub. Bu xəstəliklər zamanı ağciyər toxumasında çapıqlaşma yaranır, nəticədə nəfəsalma çətinləşir və xəstəliyin gedişi tədricən ağırlaşır.

Mütəxəssislərin məlumatına görə, preparatın təsiredici maddəsi olan nerandomilast immun sisteminin fəaliyyətini tənzimləyərək ağciyər toxumasında iltihab və zədələnməni azaltmağa kömək edir. Bunun xəstəliyin irəliləmə sürətini ləngitməsi və pasiyentlərin həyat keyfiyyətini yaxşılaşdırması gözlənilir.

Preparat yalnız həkim resepti ilə təyin ediləcək. Müalicə gündə iki dəfə qəbul edilən 18 mq-lıq tabletlər şəklində aparılacaq.

MHRA bildirir ki, dərmanın ən çox rast gəlinən əlavə təsirləri ishal və bədən çəkisinin azalmasıdır. Pasiyentlərdə hər hansı əlavə təsir müşahidə edildikdə, bu barədə müvafiq farmakonəzarət sisteminə məlumat verilməsi tövsiyə olunur.

MHRA-nın Səhiyyə Keyfiyyəti və Əlçatanlığı üzrə icraçı direktoru Culian Biç bildirib ki, nerandomilast IPF və PPF diaqnozu qoyulan yetkin xəstələr üçün yeni müalicə imkanı yaradır. Onun sözlərinə görə, preparatın təsdiqi təhlükəsiz və effektiv dərmanların əlçatanlığının artırılması istiqamətində atılan mühüm addımdır və preparatın təhlükəsizlik göstəriciləri istifadədən sonra da davamlı şəkildə izləniləcək.

Pulmonar fibroz xroniki və proqressiv gedişə malik xəstəlik olduğundan erkən diaqnostika, müntəzəm həkim nəzarəti və müasir müalicə üsullarının tətbiqi xəstələrin yaşam müddətinin və həyat keyfiyyətinin yaxşılaşdırılmasında mühüm rol oynayır. Yeni preparatın klinik praktikaya daxil edilməsi bu sahədə müalicə imkanlarının genişlənməsinə töhfə verə bilər.