Autizm spektr pozuntularının erkən aşkar edilməsi istiqamətində aparılan beynəlxalq elmi araşdırmalar mühüm nəticə ilə yadda qalıb. ABŞ və Yaponiyadan olan alimlərin birgə tədqiqatı nəticəsində azot oksidinin səviyyəsinin autizm spektr pozuntularının diaqnostikasında etibarlı biomarker ola biləcəyi müəyyən edilib.

Aztibb.az-ın www.news-medical.net-ə istinadən xəbərinə görə, tədqiqat zamanı insan kök hüceyrələri əsasında hazırlanmış xüsusi nanosensor texnologiyasından istifadə edilməklə autizmli şəxslərdə azot oksidinin səviyyəsi araşdırılıb. Əldə olunan nəticələr bu göstəricinin autizm spektr pozuntularının digər neyroinkişaf pozuntularından fərqləndirilməsində mühüm əhəmiyyət daşıdığını ortaya qoyub.

Alimlərin qənaətinə görə, tədqiqatın nəticələri gələcəkdə autizmin daha erkən və dəqiq diaqnostikasına, həmçinin fərdiləşdirilmiş müalicə üsullarının hazırlanmasına yeni imkanlar aça bilər. Bununla yanaşı, əldə olunan nəticələrin genişmiqyaslı klinik tədqiqatlarla təsdiqlənməsinin vacibliyi də vurğulanır.

Mütəxəssislərin fikrincə, bu istiqamətdə aparılan araşdırmalar neyroinkişaf pozuntularının səbəblərinin daha dərindən öyrənilməsinə və müasir diaqnostika üsullarının təkmilləşdirilməsinə mühüm töhfə verəcək.