Sibirdə qəbiristanlıqlardan götürülən DNT nümunələrinin təhlili indiyədək məlum olan ən qədim taun epidemiyasının təxminən 5 500 il əvvəl baş verdiyini ortaya qoyub.

Aztibb.az "Arqumentı i faktı" nəşrinə istinadən yazır ki, alimlər Sibirin cənubunda yerləşən Baykal gölü ətrafındakı qəbiristanlıqlarda aparılan araşdırmalar zamanı taun bakteriyasının yeni bir növünü aşkar ediblər.

Bölgənin ən böyük iki qəbiristanlığında aydın ölüm səbəbi müəyyən edilməyən çoxlu sayda uşaq və gəncin qalıqlarına rast gələn tədqiqatçılar bu ölümlərin səbəbini araşdırıblar.

Qalıqlar üzərində aparılan DNT analizləri nəticəsində məlum olub ki, qəbiristanlıqda dəfn edilmiş 46 nəfərdən 18-i taun bakteriyasına yoluxub.

Əvvəllər alimlər taunun təxminən 3 800 il əvvəl meydana çıxdığını ehtimal edirdilər. Lakin yeni tapıntılar xəstəliyin düşünüldüyündən xeyli əvvəl – təxminən 5 500 il əvvəl mövcud olduğunu göstərib.

Mütəxəssislərin fikrincə, əldə olunan nəticələr taun xəstəliyinin insanlarda mənşəyinə dair bu günə qədər müəyyən edilmiş ən qədim elmi sübut hesab oluna bilər.