Müasir qadcetlər həyatımızın ayrılmaz hissəsinə çevrilib. Smartfonlar vasitəsilə marşrut qurur, alış-veriş edir, kitab oxuyur, ünsiyyət saxlayır və asudə vaxtımızı keçiririk. Lakin ekran qarşısında həddindən artıq vaxt keçirmək sağlamlığa mənfi təsir göstərə bilər.

Aztibb.az "Doctorpiter" nəşrinə istinadən yazır ki, mütəxəssislər süni intellekt vasitəsilə rəqəmsal cihazlardan davamlı istifadənin yaratdığı beş əsas sağlamlıq problemini qruplaşdırıblar.

Boyun və bel ağrıları

Smartfona baxarkən başın uzun müddət önə əyilmiş vəziyyətdə saxlanılması "mətn boynu" (text neck) sindromuna səbəb ola bilər. Bu vəziyyət onurğaya düşən yükü artırır, əzələ gərginliyi yaradır, duruş pozğunluqlarına və narahatlığa yol açır.

Quru göz sindromu

İnsan uzun müddət ekrana baxdıqda göz qırpma tezliyi azalır. Nəticədə gözün səthi quruyur və yanma, qıcıqlanma, ağrı, eləcə də gözə qum düşmüş kimi hiss yaranır.

Yuxu pozğunluqları

Ekranlardan yayılan mavi işıq orqanizmdə yuxuya hazırlıq hormonu olan melatoninin ifrazını azalda bilər. Bu səbəbdən axşam saatlarında telefondan istifadə yuxuya getməyi çətinləşdirir və yuxunun keyfiyyətini aşağı salır.

Rəqəmsal narahatlıq və stress

Davamlı bildirişlər, xəbərlər və informasiya axını beynin fasiləsiz gərginlik rejimində işləməsinə səbəb olur. Bu isə narahatlıq səviyyəsini artırır, yorğunluq yaradır və diqqətin cəmlənməsini çətinləşdirir.

Artıq çəki riski

Ekran qarşısında uzun müddət qalmaq fiziki hərəkətsizliklə əlaqələndirilir. Bundan əlavə, video izləyərkən və ya xəbərlər oxuyarkən qidalanmaq toxluq hissinin düzgün qiymətləndirilməsinə mane olur və həddindən artıq yeməyə səbəb ola bilər.

Mütəxəssislər bildirirlər ki, qadcetlərin orqanizmə təsirini azaltmaq üçün bir sıra sadə qaydalara əməl etmək kifayətdir. Lazımsız bildirişləri söndürmək, yatmazdan ən azı bir saat əvvəl telefondan istifadə etməmək, gün ərzində qısa fasilələr vermək və gözlər üçün müntəzəm məşqlər etmək sağlamlığın qorunmasına kömək edə bilər.