Rusiyanın Skoltex İnstitutunun və N.K. Koltsov adına İnkişaf Biologiyası İnstitutunun alimləri regenerasiya mexanizmlərinin öyrənilməsində mühüm nailiyyət əldə ediblər. Tədqiqatçılar ilk dəfə olaraq yüksək bərpa qabiliyyəti ilə seçilən dəniz süngərinin genomunu tam şəkildə müəyyənləşdiriblər.

Aztibb.az "İzvestiya" nəşrinə istinadən yazır ki, bu canlı hətta ayrı-ayrı hüceyrələrə parçalandıqdan sonra belə yenidən bütöv orqanizmə çevrilə bilməsi ilə diqqət çəkir. Alimlər məhz bu qeyri-adi regenerasiya qabiliyyətinin genetik əsaslarını araşdırırlar.

Tədqiqatın əsas məqsədi toxumaların bərpasına cavabdeh olan genləri müəyyənləşdirmək və gələcəkdə insan orqanizmində zədələnmiş toxumaların bərpası üçün yeni tibbi texnologiyalar hazırlamaqdır.

Bununla belə, mütəxəssislər bildirirlər ki, bu texnologiyaların klinik praktikada tətbiqinə hələ uzun illər var. Rusiyanın Gerontoloji Elmi-Klinik Mərkəzinin əməkdaşı Mixail Bolkovun sözlərinə görə, insan hüceyrələri yüksək dərəcədə ixtisaslaşıb və onların xüsusiyyətlərinin dəyişdirilməsi onkoloji xəstəliklər də daxil olmaqla müxtəlif patoloji proseslərə səbəb ola bilər.

“Bu cür texnologiyalar gələcəyin tibbinə aiddir. Hazırda heyvan genlərinin insanların genomuna yerləşdirilməsindən söhbət getmir. Lakin müəyyən zülalların fəaliyyətini tənzimləmək üçün insan genlərinin surətlərinin hüceyrələrə çatdırılması artıq bəzi xəstəliklərin müalicəsində istifadə olunan strategiyalardan biridir”, – deyə alim vurğulayıb.

Tədqiqatçılar hesab edirlər ki, bu istiqamətdə aparılan araşdırmalar yalnız yeni müalicə üsullarının yaradılmasına deyil, həm də çoxhüceyrəli canlıların təkamülü və regenerasiya proseslərinin daha dərindən anlaşılmasına töhfə verə bilər.